«Յունիբանկ, հետ քաշե՛ք ձեր կեղտոտ ձեռքերը Հին Էրիվան հոլդինգից», «Պահանջում ենք Վարդան Աթայանի հրաժարականը» պաստառներով, այսօր «Հին Էրիվան հոլդինգ»ընկերության աշխատակիցները հոլդինգի սեփականատեր Մանվել Տեր-Առաքելյանի գլխավորությամբ, «Յունիբանկի» շենքի առջեւ ցույց էին կազմակերպել: Պարոն Տեր-Առաքելյանի խոսքերով, 7 ամիս է, ինչ Յունիբանկի տնօրինության հետ չեն կարողանում ոչ մի կերպ բանակցել. «Յունիբանկն իր գործողություններով ցույց տվեց, որ ուզում են տիրնալ «Հին Էրիվանին», որովհետեւ նրանք այդպես էլ չընդունեցին, որ մեզ անհիմն ճանաչել են ժամկետանց վարկառու»: Մանվել Տեր-Առաքելյանի խոսքերով, «Յունիբանկն» իրենց ընկերությունից պահանջում է միանգամից վերադարձնել մոտ 1 միլիարդ դրամ պարտքը, ինչի պատճառով արդեն մի քանի ամիս է արգելանք են դրել «Հին Էրիվանի»գործունեության, դրամարկղերի մուտքերի վրա: «Մեզ տանում են սնակության, որ զավթեն շենքը, «Հին էրիվանը» սնանկ չի, եւ պատրաստ է մեկ ժամում էլ վճարել պարտքը, եթե բանկի տնօրեն Վարդան Աթայանը հրապարակայնորեն ներողություն խնդրի՝ մեզ անհիմն ժամկետանց վարառու համարելու համար»: Ցուցարարները իրենց բողոքը գրավոր ձեւով ցանկացան հանձել բանկի տնօրինությանը, բայց այն բանկի կողմից չընդունվեց: Ցուցարարները պայմանավորվեցին առաջիկայում էլ ցույց անցկացնել ամբողջ քաղաքով մեկ:
Նշենք, որ շուրջ քանի ամիս է ընթանում է «Յունիբանկ»-«Հին Էրիվան» հակամարտությունը: Երկու տնտեսվարողների վեճը թեեւ տեղափոխվել է դատարան, սակայն, պարոն Տեր-Առաքելյանը գտնում է, որ բանկը ցանկացած միջոցի դիմում է, որպեսզի իրենից խլի բիզնեսը:
