Ուկրաինայում շարունակվում են դեռեւս սեպտեմբերից սկսված հակակառավարական բողոքի ակցիները, որոնք ուղղված են երկրի կառավարության կողմից քաղաքացիների որոշակի խմբի արտոնությունները չեղյալ համարելու որոշման դեմ: Կիեւում Չեռնոբիլի ԱԷԿ-ի վթարի լիկվիդատորներն ու Աֆղանսատանի պատերազմի վետերանները ստիպված են եղել ձեռնամարտի բռնվել ոստիկանության «Բերկուտ» հատուկ ջոկատի զինծառայողների հետ: Newsru.ua-ի մատուցմամբ, քաղաքական գործիչներից ոմանք դժգոհ քաղաքացիներին կոչ են արել դադարեցնել բողոքի ակցիաները՝ նկատի ունենալով, որ նրանց պահանջն անիմաստ է. Ուկրաինայի պետբյուջեում, միեւնույնն է, այդ արտոնությունների վճարման համար ֆինանսական միջոցներ չկան:
Կիեւում բողոքի ակցիան տեղի է ունեցել Ուկրաինայի կառավարության շենքի մոտ, որտեղ «Չեռնոբիլի»
եւ «Աֆղանստանի» վետերանները այսօր փորձել են վրաններ տեղադրել, սակայն «Բերկուտի» աշխատակիցները կասեցրել են այդ փորձերը: Արդյունքում կողմերի միջեւ մի քանի անգամ ծեծկռտուք է եղել: Իրավիճակը հանդարտվել եւ բախումները դադարել են միայն այն բանից հետո, երբ իրավապահ մարմինների աշխատակիցները առգրավել են վրանները:
Ուկրաինայի կառավարությունը մտադիր է չեղյալ համարել ոստիկանության եւ դատախազության, պետական հրշեջ ծառայության, առողջապահության, մշակույթի թոշակի անցած աշխատակիցների, նաեւ հանքափորների, Չեռնոբիլի ԱԷԿ-ի վթարից տուժածների, պատերազմի վետերանների, ֆաշիստական Գերմանիայի օկուպացիայից տուժածների համար սահմանված արտոնությունները:
