Բեռլինի ֆիլհարմոնիայի կամերային դահլիճում նոյեմբերի 19-ին ճանաչված դիրիժոր Ալեքսանդր Լիբրայխի ղեկավարությամբ, Մյունխենի կամերային նվագախմբի, RIAS կամերային երգչախմբի, Քրիստինա Քայզերի (սոպրանո), Էնդրյու Ռեդմոնդի (բարիտոն) մեկնաբանմամբ կայացել է անվանի կոմպոզիտոր Տիգրան Մանսուրյանի Հայոց ցեղասպանության զոհերի հիշատակին նվիրված «Ռեքվիեմի» պրեմիերան:
«Առավոտի» հետ զրույցում կոմպոզիտորն ասաց, որ այս ստեղծագործության վրա աշխատել է շուրջ 10 տարի. «Միացրել եմ լատինական լեզուն եւ բնիկ հայկական երգեցողությունը, որով ներկայացրել եմ հայ ժողովրդի համընդհանուր ցավը, ինչպես նաեւ ընտանիքիս պատմությունը»:
Տիգրան Մանսուրյանը նշեց, որ, ըստ պայմանագրի, «Ռեքվիեմը» տարիուկես պետք է կատարեն միայն պատվիրատուները՝ Մյունխենի կամերային նվագախումբը եւ RIAS կամերային երգչախումբը: Մեր հարցերին՝ ստացվում է, որ մեծակտավ այս ստեղծագործությանը Հայաստանում պետք է սպասել շուրջ 2 տարի, եւ ինքը ո՞ւմ կվստահի դրա կատարումը, Տ. Մանսուրյանը պատասխանեց. «Առաջին կատարողները՝ գերմանացի բարեկամներս, մեծ ցանկություն ունեն «Ռեքվիեմը» հնչեցնել հենց Հայաստանում: Ընդ որում, դա նաեւ իմ մեծ ցանկությունն է: Հասկանալի պատճառներով, մեծ թվով երաժիշտների Հայաստան հրավիրելը ֆինանսական խնդիր է: Այս պահին տեղյակ եմ, որ մերոնք էլ դեմ չեն: Իսկ թե հայաստանյան կատարումը մեր կոլեկտիվներից ու մեներգիչներից ո՞ւմ կվստահեմ, այս պահին չեմ ցանկանա բարձրաձայնել»:
Սամվել ԴԱՆԻԵԼՅԱՆ
