Հայաստանում դեղերի գներն անվերահսկելի են: Դեղերի գներն ավելացվում են մոտ 200% -ով: Այսօր «Հայելի» ակումբում ասուլիսում այս մասին ասաց ԱԺ պատգամավոր Կարեն Ավագյանը: Նա առաջարկեց հաստատել դեղերի հստակ գնային քաղաքականություն:
Անդրադառնալով շուկայի խնդիրներին, պարոն Ավագյանն առանձնացրեց ժամկետանց դեղերի առկայությունը: Նրա խոսքերով, դեղատների աշխատակիցները սովորաբար հենց միտումնավոր են դեղերի վրայից հանում ժամկետները. «Մկրատով կտրում են՝ առանձնացնում դեղերը ու այդկերպ ժամկետը հեռացնում»: Առողջապահության նախարարության աշխատակազմի ղեկավար Սուրեն Քրմոյանն էլ հավելեց, որ վերջին 1 տարում ներկայացրել են դեղատնային գործունեությունը դադարեցնելու 34 հայց: Նրա խոսքերով, դեղատնային գործունեության կանոնները խախտելու համար 17 սուբյեկտ արդեն տուգանվել է, 11-ն էլ պատժվել են չգրանցված դեղեր շրջանառելու համար: Ժամկետանց դեղեր էլ հայտնաբերվել է 2 դեղատանը, նրանց եւս տուգանել են:
Պարոն Քրմոյանը չհամաձայնեց, թե բժիշկները սովորաբար համագործակցում են կոնկրետ դեղատների հետ ու շատ հաճախ հիվանդներին հենց այդ դեղատուն են ուղղորդում. «Բժիշկների գերակշիռ մասը այդպիսի գործողություններից զերծ է մնում, որովհետեւ երդում են տվել, բայց եկեք այդպիսիներին քրեական պատասխանատվության ենթարկենք»:
Կարդացեք նաև
Արփինե ՍԻՄՈՆՅԱՆ
