Ծաղկի թերթիկը կարող է դառնալ գովազդի տարածք
Սովորաբար դաջվածք ասելով հասկանում ենք մարդու մարմնի վրա արվող զարդանախշերը: Գուցե զարմանալի թվա, բայց ծաղիկները նույնպես կարող են դաջվածքներ ունենալ: Խոսքը ծաղիկների ձեւավորման նոր տեխնոլոգիայի մասին է՝ դաջվածք ծաղկի թերթերի եւ տերեւների վրա:
Մեր երկրում ծաղիկների զարդարման այս նոր տիպը երկու տարի է, ինչ կիրառում են Սուսաննա Կիրակոսյանն ու նրա մի քանի ընկերները: Ս. Կիրակոսյանի ներկայացմամբ՝ ծաղիկների վրա դաջվածքն արվում է ամերիկյան հատուկ տեխնոլոգիայով ու հատուկ ներկերով: «Դա չի փչացնում ծաղիկը, որովհետեւ տեխնոլոգիան այնպես է մշակված, որ ծաղկի համար նախատեսում է հատուկ շնչուղիներ»,- պատմում է Սուսաննան: Բույսերի ֆիզիոլոգ Կարինե Ազատյանն այլ կարծիքի է: Նրա խոսքերով, դաջվածքը ստացվում է հոսանքով ինչ-որ բան այրելու միջոցով: «Այրված հատվածը չի կարող վնաս չստանալ: Ծաղկի վրա այրվածքով արված դաջվածքը կխախտի բույսի բջիջների ամբողջականությունը: Վնասված մասից կարող են թափանցել սնկեր եւ ախտահարել բույսը, որի հետեւանքով այն կփտի»,- բացատրեց բույսերի ֆիզիոլոգը: Վերջինս, սակայն, հավելեց նաեւ, որ ինքն ու իր գործընկերները գրեթե ծանոթ չեն ծաղիկները զարդարելու այս տարբերակին եւ, գուցե, այն ստեղծված է այնպես, որ բույսին նվազագույն վնաս հասցվի:
Սուսաննան համոզված է՝ դաջվածքը ոչ միայն անվտանգ է ծաղկի համար, այլեւ ձեւավորման հուսալի միջոց է. ծաղկի թերթիկները շոշափելու ու անգամ դրանք թրջելու պարագայում ներկն ու դաջվածքը չեն մաքրվի, այդ է վկայում ամերիկյան փորձը, ինչին հավատարիմ են նաեւ Հայաստանում:
Կարդացեք նաև
Արամը, ով առաջին անգամ չէ, որ պատվիրում է դաջվածքապատ ծաղիկներ, ասում է. «Կոնկրետ ինձ համար այնքանով է լավ, որ, երբ վիճած եմ լինում ընկերուհուս հետ, ծաղիկների վրա դաջել եմ տալիս «ներիր ինձ», նմանատիպ այլ բառեր ու սիրո խոստովանություններ ու նվիրում նրան»:
Յուրաքանչյուր դաջվածք ունի ինքնատիպ բովանդակություն: Դրանում, Ս. Կիրակոսյանի խոսքով, կարող են հանդես գալ տարբեր բարեմաղթանքներ, սիրո խոստովանություններ, անգամ կազմակերպությունների լոգոտիպեր եւ այլն. «Փաստորեն, ծաղկի թերթիկը դառնում է գովազդի տարածք»,- ընդգծեց Սուսաննան, որի փոխանցմամբ, դաջման շնորհիվ ծաղկի վրա կարելի է տեղադրել նաեւ լուսանկար:
Ամենօրյա պատվիրատուների թվում առաջին տեղում տղաներն են, հետո՝ աղջիկները, ովքեր դաջված ծաղիկներ են նվիրում իրենց մայրերին: Յուրահատուկ կարգավիճակում են ուսուցիչները, որոնց համար եւս պատվերներ լինում են:
Ս. Կիրակոսյանը կարեւորեց մեկ հանգամանք՝ ոչ բոլոր ծաղիկներն են, որ իրենց թերթերի վրա կարող են դաջվածքներ կրել: Նրա պարզաբանմամբ, մանր տերեւներ ու թերթիկներ ունեցող ծաղիկներն իրենց բարդ կառուցվածքի պատճառով դժվարություններ են ստեղծում դաջման ընթացքում: Ի տարբերություն այդ տիպի ծաղիկների՝ դաջման համար շատ հարմար են վարդը, կակաչը եւ լայնաթերթ բոլոր ծաղիկները:
Ծաղկի դաջվածքները շատ մեծ լինել չեն կարող. պետք է լինեն այնպիսին, որ հեշտությամբ տեղավորվեն, օրինակ՝ վարդի թերթի վրա: Դաջվածքը կարող է բաղկացած լինել մեկ խոսքից, փոքրիկ արտահայտությունից: Բայց, անկախ այս տարբերություններից, մեկ դաջվածքն արժե 600 դրամ:
ԱՆԻ ԳՅՈԶԱԼՅԱՆ
ԵՊՀ ուսանողուհի
«Առավոտ» օրաթերթ
