Կամ՝ Նարեկ Խեչոյանի «Առաջնայնության պրոյեկցիան»
Լուսանկարիչ Նարեկ Խեչոյանը այս էլ որերորդ անգամ անհատական լուսանկարների ցուցահանդես է կազմակերպում, վերջին անգամ՝ «Բյուրոկրատ» գրախանութում՝ «Առաջնայնության պրոյեկցիա» խորագրով: Թեեւ լուսանկարչին թվում է, թե հանրությունը այդքան էլ լավ չի պատկերացնում իր աշխատանքների բուն իմաստը, բայց հույս ունի, որ մի օր մարդիկ այս ամենին ավելի փիլիսոփայնորեն կմոտենան:
Նա լուսանկարչությամբ զբաղվում է 1998 թ.-ից, իսկ վերջին նախագծով՝ 2006-ից: Նարեկը ավարտել է Փ. Թերլեմեզյանի անվան գեղարվեստի ուսումնարանի գեղանկարչության բաժինը:
– Զբաղվելով լուսանկարչությամբ՝ տեսնո՞ւմ եք սահմանային գծեր գեղանկարչության հետ:
Կարդացեք նաև
– Իմ աշխատանքները մոտ են գեղանկարչությանը, եւ իմ լուսանկարները շատ ավելի հեռու են լուսանկարչական ավանդական մոտեցումներից: Ես շատ ավելի ազդվում եմ գեղանկարչությունից, եւ այսօր աշխարհում գոյություն ունեցող ավանդական լուսանկարչության հանդեպ անտարբեր եմ: Ինձ հարազատ են Շագալի, Կլայնի եւ այլոց աշխատանքները:
– Լինո՞ւմ է, որ մի նկարի համար օրերով աշխատեք:
– Իհարկե: Պատահում է, որ մի նկարի գաղափարի վրա օրերով ու շաբաթներով եմ աշխատում, բայց լինում է նաեւ, որ միանգամից նկարում եմ, մի տեսակ հոգեպես եմ ոգեշնչվում: Իմ գործերը երբեք համակարգչային ձեւափոխության չեն ենթարկվում՝ գուների հետ կապված, ռակուրսի, մասշտաբի: Ինչպես լուսանկարում եմ, այնպես էլ երեւակում ու արտատպում:
– Հեռուստատեսությունում օպերատոր եք աշխատում, կա՞ ընդհանրություն օպերատորության եւ լուսանկարչության մեջ:
– Դրանք սերտորեն կապված են միմյանց հետ: Ավելին՝ օպերատորությունը սկսվում է հենց լուսանկարչությունից: Բայց լուսանկարչական արվեստը ավելի շատ գեղանկարչությանն է մոտ կանգնած:
Այսօր օպերատորությունն ինձ համար զուտ կենսական խնդիր է լուծում. աշխատում եմ օպերատոր եւ վարձատրվում, իսկ լուսանկարչության համար ինձ ոչ ոք չի վարձատրում, այն ինձ համար կարծես հոգեւոր սնունդ լինի:
– Ձեր այս ցուցահանդեսը անվանել եք «Առաջնայնության պրոյեկցիա» եւ այն բացատրել եք որպես մատերիայի, տարածության, ժամանակի եւ կետի փոխհարաբերություն: Ինչի՞ հետ եք կապում այս փիլիսոփայությունը:
– Իմ բոլոր աշխատանքները ես կատարում եմ հետեւյալ ոճով՝ այն, ինչ կա իմ սեփական կյանքում, արտացոլում եմ արվեստում: Այս դեպքում արտացոլել եմ այն, ինչ կցանկանայի տեսնել կյանքում, այն է՝ հոգեւորի նախապատվությունը կենցաղայինից:
Հարցազրույցը՝ ՍԵՎԱԿ ՎԱՐԴՈՒՄՅԱՆԻ
Լուսանկարը՝ ԱՎԵՏԻՔ ՀԱՐՈՒԹՅՈՒՆՅԱՆԻ
«Առավոտ» օրաթերթ
