Մոսկվայում տեղի ունենալիք ընտրությունների կապակցությամբ դեկտեմբերի 3-4-ը հասարակական կարգը ապահովելու է ՌԴ ոստիկանության եւ ներքին զորքերի ավելի քան 51 հազար աշխատակից ու զինծառայող: Այդ մասին հաղորդում է РИА Новости-ին` վկայակոչելով ՆԳՆ Մոսկվայի պետական վարչության հասարակական կարգի պահպանության վարչության պետ Վյաչեսլավ Կոզլովին:
Դեկտեմբերի 1-5-ը մայրաքաղաքի ոստիկանությունն անցնելու է ծառայության ուժեղացված ռեժիմի: Քվեարկության նախօրեին Մոսկվայի բոլոր ընտրական տեղամասերը ստուգվելու են, այդ թվում` կինոլոգների կողմից: Ընտրատեղամասերից 509-ում կտեղադրվեն մետաղորսիչներ, մյուս տեղամասերում ոստիկաններին ձեռքի մետաղորսիչներեն տրամադրվելու: ՌԴ ՆԳՆ Մոսկվայի վարչությունում, մայրաքաղաքի ոստիկանապետի գլխավորությամբ ստեղծվել է օպերատիվ շտաբ, որն աշխատելու է ընտրությունների ողջ ժամանակահատվածում: Համանման շտաբներ ձեւավորվել են նաեւ մերձմոսկովյան շրջաններում:
«Ինտերֆաքսի» մատուցմամբ, Կոզլովն ասել է, թե ոստիկանությունը կասեցնելու է ցանկացած սադրանք կամ անօրինական զանգվածային միջոցառում անցկացնելու որեւէ փորձ: «Ընտրությունները դեռ տեղի չեն ունեցել, իսկ ոմանք ուզում են դրանց արդեն գնահատական տալ»,- տարակուսել է Մոսկվայի ոստիկանապետը, որի ասելով մի շարք կուսակցություններ ու շարժումներ արդեն իսկ ընտրությունների օրը բողոքի ցույց անցկացնելու հայտեր են ներկայացրել:
ՌԴ խորհրդարանական ընտրությունները Մոսկվայում տեղի են ունենալու դեկտեմբերի 4-ին, 3374 ընտրատեղամասերում: Մայրաքաղաքում գրանցվել է շուրջ 7 միլիոն ընտրող:
