Թուրք-ադրբեջանական միասնությունը կդառնա աշխարհում ամենահզոր ուժը, որին ոչ ոք չի կարող դիմակայել: 1news.az-ի մատուցմամբ, այդպիսի հայտարարություն է արել թուրքական Turcas էներգետիկ ընկերության նախագահ Էրդալ Աքսոյը:
«Կգա մի ժամանակ, երբ հայերը աշխատանք կփնտրեն Ադրբեջանում»,- Բաքվում, լրագրողների հետ հանդիպման ժամանակ ասել է Աքսոյը:
Թուրքական ընկերության ղեկավարը նաեւ վստահեցրել է, թե 20 տարիների ընթացքում Ադրբեջանը դարձել է աշխարհում էներգառեսուրսների ամենակարեւոր ու հուսալի մատակարարներից մեկը: «Մենք հիմա աշխատում ենք Ադրբեջանում ազատ տնտեսական գոտի եւ արդյունաբերական ավան ստեղծելու ուղղությամբ: Կարծում եմ, այդ նախագծերը կլինեն մեր եղբայրության ու միասնության եւս մեկ ապացույցը. դրանում ոչ ոք չպետք է կասկածի»,- հայտարարել է թուրք գործարարը:
Հիշեցնենք, որ նախօրեին Բաքվում տեղի է ունեցել ադրբեջանա-թուրքական բիզնես-ֆորում, որին մասնակցել են թուրքական եւ ադրբեջանական շուրջ 250 ընկերությունների ներկայացուցիչներ:
