Դատարանի որոշմամբ կալանք է դրվել «Հին էրիվան» հոլդինգի գույքի եւ բանկային հաշիվների վրա։ «Ժողովուրդ»-ը տեղեկացավ, որ սա արվել է այն բանից հետո, երբ «Յունիբանկ»–ը համապատասխան հայց է ներկայացրել ռեստորանային համալիրի դեմ։ Բանն այն է, որ վերջերս «Հին Էրիվան»-ն էլ իր հերթին էր հայցադիմում ներկայացրել «Յունիբանկ»–ի դեմ՝ գործարար համբավը վնասելու համար՝ պահանջելով պարտավորեցնել բանկին՝ չեղյալ համարել հոլդինգին «ժամկետանց վարկառու» ճանաչելու որոշումը։ Դատաքննության ընթացքում «Հին Էրիվան»-ը խնդրել է, որ վարկն ու դրա տոկոսները վճարի դատարանի վճռից հետո։ Դատաքննության փուլում որոշ փաստաթղթերի փորձաքննություն նշանակելու համար կասեցվել է գործը, մինչեւ դրանց պատասխանները ստանալը։ Եվ փաստորեն, օգտվելով առիթից, «Յունիբանկ»-ն է հայց ներկայացրել «Հին Էրիվան»-ի դեմ։ «Ժողովուրդ»-ի հետ զրույցում «Հին Էրիվան» հոլդինգի սեփականատեր Մանվել Տեր-Առաքելյանը կատարվածը գնահատեց որպես իրենց գործունեությունը սահմանափակելու փորձ։ «Դրանով «Յունիբանկ»-ի ղեկավար Վարդան Աթայանն ապացուցեց, որ աչք ունի մեր ռեստորանի վրա եւ պարզապես ցանկանում է այն խլել»,- նշեց Տեր-Առաքելյանը:
«Ժողովուրդ»
