Այսօր Երեւանի «Գլաձոր» համալսարանի դահլիճում տեղի ունեցավ հոբելյանական հանդիսություն` «Կրթություն» շաբաթաթերթի նոր տարեշրջանի 500-րդ համարի լույս ընծայման առթիվ:
Իր խոսքում ՀՀ ԿԳ նախարար Արմեն Աշոտյանը նշեց, որ «Կրթությունն» իր գործունեությամբ կարծես սնում է ԿԳ նախարարությունը, թեպետ չի հանդիսանում նրա պաշտոնաթերթը. «Ուրախ եմ, որ այն իր շուրջն է համախմբում գիտելիքի գինը գիտակցող մտավորականների լայն շրջանակներին»:
«Գլաձոր» համալսարանի ռեկտոր Ժորա Ջհանգիրյանի խոսքերով` «Կրթություն» թերթը չհիշելն անշնորհակալ քայլ կլինի. «Նրա դերն ու նշանակությունը հայեցի դաստիարակության հարցում գնահատելը յուրաքանչյուրիս պարտականությունն է»:
Հայաստանի գրողների միության նախագահ Լեւոն Անանյանն էլ հավելեց. «Կրթությունը» մեծ ձեռքբերում է: Այն մտավորականներին ուրախացնում է գրականության հանդեպ ճիշտ մոտեցմամբ»:
Կարդացեք նաև
Իսկ գրող Զորի Բալայանի խոսքերով` 500-ամյակը տոնելը մեծ հպարտություն է. «Չեմ ընդունում վաղուց տարածված այն կարծիքը, թե թերթը ապրում է մեկ օր: 500 համարները կազմում են մի ողջ տարեգրություն»:
Հայաստանի ժուռնալիստների միության նախագահ Աստղիկ Գեւորգյանը ասում է, որ մայրենի լեզվի ոչ բավարար դրսեւորման պայմաններում կարեւոր է «Կրթության» պայքարը` լեզուն անաղարտ պահելու գործում:
Հանդիսության ընթացքում ԿԳ նախարարության կողմից պատվոգրերի արժանացան թերթի աշխատակազմի ներկայացուցիչներ Գեղամ Նուրիջանյանը, Նունե Բադալյանը, Կարո Վարդանյանը, իսկ գլխավոր խմբագիր Գագիկ Մինասյանը ՀՀ վարչապետ Տիգրան Սարգսյանի եւ Հայաստանի գրողների միության կողմից արժանացավ համապատասխանաբար շնորհակալագրի եւ պատվոգրի:
Լուիզա ՍՈՒՔԻԱՍՅԱՆ
