Սյունիքի մարզի Տաթեւ գյուղում բնակիչների մի մասը վառելափայտ չունենալու պատճաոով աթարի միջոցով է տաքացնում տունը: Ջեռուցման ավանդական այս եղանակին տաթեւցիներն ապավինել են` այլ տարբերակ չունենալով: Գյուղը գազիֆիկացված չէ, վառելափայտը շատ թանկ է, բացի այդ՝ փայտ ձեռքբերելն այս տարի լուրջ խնդիր է գյուղաբնակների համար: Բնակիչների քիչ տոկոսն է ապահովված վառելափայտով, մյուսները դեռ փայտ չեն գնել՝ որոշ դժվարություններից ելնելով: «Այս տարի Տաթեւի մերձակա անտառում հատատեղ չէին հատկացրել գյուղացիների համար, որոշ գյուղացիներ էշով անտառի թափուկներից են բերել, իսկ մի մասը պիտի ուրիշ տեղից փայտ բերի, բայց դա էլ շատ հեռու է ու բավականին դժվարությունների հետ կապված: Անցած տարի մեր մոտակա անտառում հատատեղ էին հատկացրել, գյուղի բնակիչների 50 տոկոսն էդ հատատեղից է ձմեռվա համար վառելափայտ ձեռք բերել, էս տարի հատատեղի բացակայության պատճառով խնդրի առաջ ենք կանգնել, նույնիսկ բնապահպանության նախարարություն դիմեցինք, աջակցեն էս հարցով» – ասում է Տաթեւի գյուղապետ Մուրադ Սիմոնյանը:
Մերի ՍՈՂՈՄՈՆՅԱՆ
Հ. Գ. «Առավոտի» կողմից հիշեցնենք, որ ժամանակին, երբ գազի սակագինը մեծացնելու որոշումն էր քննարկվում՝ ԲՀԿ պատգամավոր Վարդան Բոստանջյանն առաջարկում էր աթար վառել: Փաստորեն նրա առաջարկները կյանքի են կոչվում:
