Ծանրամարտի աշխարհի առաջնության ավարտից հետո մեր առաջատար ծանրորդները ներկայումս անցնում են բուժհետազոտություններ:
Տղամարդկանց ազգային հավաքականի գլխավոր մարզիչ Պողոս Պողոսյանն Aravot.am-ին տեղեկացրեց, որ Փարիզից վերադառնալու ճանապարհին Տիգրան Գ. Մարտիրոսյանը մնացել էր Մոսկվայում` թիակի լայն ոսկորի հետ ունեցած խնդիրների պատճառով եւ բուժհետազոտություն էր անցնում: «Դրանից հետո որոշվեց նրան ուղարկել Գերմանիա եւ ծանրորդը մոտ չորս օր առաջ մեկնել է: Վնասվածքը լուրջ չէ եւ վիրահատության կարիք չկա: Պարզապես, նա այնտեղ լավագույն մասնագետների հսկողությամբ բուժումներ պետք է ընդունի», – ասաց մարզիչը:
Ինչ վերաբերում է Մելինե Դալուզյանին եւ Հռիփսիմե Խուրշուդյանին, Հայաստանի կանանց ընտրանու գլխավոր մարզիչ Արտաշես Ներսիսյանի խոսքերով՝ երկուսն էլ հիմա Հայաստանում են, անցել են համապատասխան բուժզննում. Մելինեն` արմունկի եւ ծնկի (սա նրա մոտ առկա է արդեն մի քանի տարի), Հռիփսիմեն` արմունկի, որը վնասեց Փարիզում: «Այս պահին նրանք չեն մարզվում եւ սպասում են տեղի բժիշկների վերջնական որոշմանը: Եթե ապաքինումը հնարավոր է կազմակերպել Հայաստանում, կմնան, իսկ եթե արտասահման մեկնելու կարիք լինի, կդիմենք ՀԱՕԿ եւ կուղարկենք: Լավ կլինի, որպեսզի բոլոր խնդիրները լուծվեն մինչեւ Նոր տարի, որպեսզի կարողանանք լիարժեք նախապատրաստվել օլիմպիական խաղերին», – ասաց Ա. Ներսիսյանը:
Աշոտ ՀԱԿՈԲՅԱՆ
