Բացվեց Անդրանիկ Քեշիշյանի լուսանկարչական ցուցահանդեսը
Հեռուստաօպերատոր, լուսանկարիչ Անդրանիկ Քեշիշյանի մասին գուցե շատերը լսած չլինեն: Նա լուսանկարչությամբ զբաղվում է 15 տարի, երկար տարիներ Մոսկվայում բնակվելուց հետո 2011 թ. տեղափոխվել է Հայաստան՝ նպատակ ունենալով հետագա ստեղծագործական կյանքը շարունակել այստեղ: Օրերս «Նարեկացի» արվեստի կենտրոնում կայացավ Անդրանիկ Քեշիշյանի ցուցահանդեսը՝ «Ամենակարեւորն արվեստում չափի զգացումն է» խորագրով:
29-ամյա հեռուստաօպերատորի աշխատանքներն առանձնահատուկ են նրանով, որ նախապես մտածված սյուժե ունեն, նատյուրմորտներ են, որոնցում առկա են նուրբ եւ կոպիտ առարկաների համադրություններ, այլախոհություն, իրեր, որոնք առանձին վերցրած՝ ուրիշ իմաստ ունեն, սակայն լուսանկարներում բոլորովին այլ միտք են արտահայտում: Առօրյայում գործածական եւ առանձնակի գեղեցկություն չունեցող առարկաները լուսային խաղի եւ հատուկ (ոչ համակարգչային) էֆեկտների արդյունքում յուրահատուկ հետաքրքրություն եւ գեղեցկություն են ստանում: «1998 թվականն էր, երբ հայրիկիցս տեսախցիկ նվեր ստացա, սկսեցի դրանով նկարել ինձ համար: Այնուհետեւ փորձեցի ընդունվել Մանկավարժական համալսարանի մշակույթի ֆակուլտետ, սակայն չստացվեց, գնացի բանակ, վերադառնալուց հետո տեղափոխվեցի Մոսկվա, ուր եւ ընդունվեցի հեռուստատեսության ինստիտուտ: Լուսանկարչությամբ ավելի ուշ սկսեցի զբաղվել»,- պատմեց Անդրանիկ Քեշիշյանը:
Անդրանիկի ցուցահանդեսին ներկայացվեցին ոչ միայն նրա ստեղծագործությունները, այլեւ դրանց ստեղծման, նկարահանման գործընթացը: Հաջորդ տարի Անդրանիկը նախատեսում է երկրորդ ցուցահանդեսը, որի առանցքում մեխերը կլինեն, իսկ թեման՝ Կամասուտրան։ «Լուսանկարելու ընթացքում ես ավելի շատ նկարահանման ընթացքից եմ հաճույք ստանում, քան նկարից: Երբ դասավորում եմ առարկաները, լույսերն եմ ուղղում, երկար ժամանակ չարչարվում եմ մեկ կադր ստանալու համար: Այդ պրոցեսն է ինձ համար ամենահաճելին»,- զրույցի վերջում հավելեց լուսանկարիչը:
ՄԱՐԻ ԽԱՉԱՏՐՅԱՆ
«Առավոտ» օրաթերթ
