Հայաստանում Ֆրանսիական համալսարանում երեկ կազմակերպվել էր ինտելեկտուալ խաղ-վիկտորինա, որը համախմբել էր ուսանողների՝ տարբեր բուհերից: Մասնակցում էին Երեւանի պետական համալսարանը, Բժշկական համալսարանը, Խ. Աբովյանի անվան մանկավարժական համալսարանը, Երեւանի Ճարտարապետա-շինարարական համալսարանը, Վ. Բրյուսովի անվան լեզվաբանական համալսարանը եւ Հայ-ռուսական սլավոնական համալսարանը:
Ողջույնի խոսքով հանդես եկան Հայաստանում Ֆրանսիական համալսարանի ռեկտոր Ժոել Լը Մորզելեկը, Հայաստանի պետական մանկավարժական համալսարանի ռեկտոր Ռուբեն Միրզախանյանը եւ Փիլիսոփայության միջազգային ակադեմիայի նախագահ Գեւորգ Բրուտյանը: Խաղավարը հնչեցնում էր հարցեր, որոնք պահանջում էին ոչ այնքան հաստատուն գիտելիքներ, որքան ճկուն ու տրամաբանող միտք: Առաջին խաղի ժամանակ հնչեց 12 հարց, յուրաքանչյուր հարցի համար հատկացվեց 1 միավոր ու 1 րոպե ժամանակ, իսկ պատասխաններն ընդունվում էին գրավոր տեսքով:
Հաղթողների եւ մասնակիցների համար կազմակերպիչները պատրաստել էին խրախուսական մրցանակներ եւ պատվոգրեր: Ինտելեկտուալ խաղը համատեղում էր ժամանցն ու օգտակարը, մասնակիցները ձեռք էին բերում գիտելիքներ հոգեւոր կյանքի մասին եւ ընդհանրապես: Ծրագրի նպատակն էր երիտասարդության շրջանում նպաստել ինտելեկտուալ մակարդակի բարձրացմանը, միջհամայնքային կապի ստեղծմանը, թիմային աշխատանքի ձեւավորմանը եւ խրախուսմանը:
ԱՆԺԵԼԱ ՇԱՀՈՒՄՅԱՆ
Կարդացեք նաև
«Առավոտ» օրաթերթ
