Հայ միգրանտները, մեկնելով արտերկիր, շատ հաճախ աշխատանքի եւ դրա դիմաց վճարման հետ կապված խնդիրներ են ունենում: Այդ իսկ պատճառով Հայաստանի Հանրապետության Արհմիությունների կոնֆեդերացիան Ռուսաստանի Դաշնության Վոլգոգրադի մարզի Արհմիությունների կոնֆեդերացիայի հետ միասին կնքել է պայմանագիր, ըստ որի՝ մեր երկրի քաղաքացին Վոլգոգրադում օրինական աշխատելու ընթացքում եթե առնչվի որեւէ աշխատանքային խնդրի, կարող է դիմել տեղի Արհմիությունների կոնֆեդերացիա եւ ստանալ պահանջվող խորհրդատվությունն ու անհրաժեշտության դեպքում՝ նաեւ պաշտպանությունը: Այս մասին Ծաղկաձորում կայացած արհմիությունների գործունեությանը վերաբերող երկօրյա սեմինարի ժամանակ լրագրողներին հայտնեց ՀՀ Արհմիությունների կոնֆեդերացիայի նախագահ Էդուարդ Թումասյանը: Նրա խոսքերով, սա արվում է թրաֆիքինգի դեմ պայքարի շրջանակներում. «Ամբողջ Եվրոպայում արհմիությունները սկսել են պայքարել նաեւ թրաֆիքինգի դեմ: Մենք էլ ներգրավվեցինք այս գործընթացի մեջ: Հիմա էլ գործում է «թեժ գիծը», մարդիկ կարող են իրենց դժգոհություններով ու մտահոգող խնդիրներով դիմել, մենք նաեւ բրոշյուրներ ենք տրամադրում, սակայն ծրագիրը այլեւս չի ֆինանսավորվում»:
Ա. Խ.
«Առավոտ» օրաթերթ
