«Առավոտի» աղբյուրների մատուցմամբ՝ ամիսներ առաջ, երբ ՀՀԿ-ում Երեւանի նախկին քաղաքապետ Գագիկ Բեգլարյանին վերջնականապես մոռացված էին համարում, վերջինս համախոհների մի նեղ շրջապատում տարակուսանք էր հայտնել ՀՀ նախագահ Սերժ Սարգսյանի կողմից իրեն պաշտոնանկ անելու առնչությամբ: Նախկին քաղաքապետի եւ ընտրությունների կազմակերպման փորձառություն ունեցող Բեգլարյանի ասելիքը մոտավորապես այս էր եղել. Սերժն ինձ հանեց, էն Լեւոնը (խոսքը Տեր-Պետրոսյանի մասին է- խմբ.) Զուրաբյանին ՀԱԿ-ից հանեց… Հույսներն ո՞ւմ վրա են դրել, հիմա դրանք էս ընտրություններն ումո՞վ են անելու:
Մեր աղբյուրը հենց Բեգլարյանի ընտրական գործընթացները կազմակերպելու, ընտրազանգված մոբիլիզացնելու ու դրանք իշխանության համար ցանկալի հունով ուղղորդելու ունակությամբ էլ բացատրեց, իր ասելով, հավաստի տեղեկությունը, թե՝ ՀՀ նախագահականում քննարկվում է առաջիկայում կառավարությունում կառուցվածքային փոփոխություն անելու հարցը: Ըստ այդմ, նախատեսվում է փոխվարչապետի եւ տարածքային կառավարման նախարարի պաշտոնները տարանջատել եւ տարածքային կառավարման նախարարի պաշտոնում նշանակել հենց Գագիկ Բեգլարյանին՝ Արմեն Գեւորգյանին թողնելով միայն փոխվարչապետի խորհրդանշական պաշտոնը:
