Նոյեմբերի 24-ին տեղացած առատ ձյան պատճառով դժվարացել էր երթեւեկությունը Իջեւան-Նոյեմբերյան ճանապարհին: Ժամը 17:20-ի սահմաններում Հայաստան բեռներ ներկրող «ֆուռ»-երից մեկը Ոսկեպար-Կիրանց շրջանցիկ ճանապարհից սահելով` փակել էր ճանապարհը: Այդ պատճառով այս ճանապարհին ընդհանրապես խափանվել էր երթեւեկությունը: Մեքենաները ստիպված էին Ոսկեպար-Կիրանց հատվածը հաղթահարել հայ-ադրբեջանական սահմանի երկայնքով ձգվող, ռազմական նշանակության հողային ճանապարհով: Այստեղ էլ մի «Ժիգուլի» սահելով` դուրս էր ընկել ճանապարհից:
Նոյեմբերի 24-ին ժամը 18-ի սահմաններում Նոյեմբերյան քաղաքի ծայրամասում, «Մասիս Տոբակո» ընկերության գրասենյակի մոտ կուտակվել էր մոտ 20 «ֆուռ»: Դրանցից առաջինը թեքությամբ փակել էր ճանապարհի կեսը եւ մյուս բեռնատարների ճանապարհը: Սակայն ճանապարհի կեսը բաց էր եւ մարդատարներն անցնում էին այդ տարածքով: Նշված հատվածում, ինչպես նաեւ Ոսկեպար-Կիրանց ճանապարհին՝ խցանումների վայրում, ուժեղացված հսկողություն էին իրականացնում պետավտոտեսչության աշխատողները:
Նոյեմբերյանի «Լեւոն երկրորդ» եւ «Իջեւանի ՃՇՇ» աշխատողներն ավազախառն աղ էին ցրում, գրեյդերները մաքրում էին ճանապարհի ձյունը: Նշենք, որ հոկտեմբերի 2-ին Այրում քաղաքի մոտ հողի սողանքի պատճառով մեծացել է Նոյեմբերյան-Իջեւան ճանապարհի երթեւեկը :
Ի դեպ, չնայած Երեւանում ՀԱԿ հանրահավաք էր, սակայն մարզի ոստիկանները չէին փակել ճանապարհները:
Կարդացեք նաև
Ոսկան ՍԱՐԳՍՅԱՆ
