Ո՞վ կդառնա Տալի հուշամրցաշարի հաղթող: Հարցի պատասխանը կիմանանք մի քանի ժամվա ընթացքում, քանի որ այս պահին աշխարհի ուժեղագույն գրոսմայստերները խաղում են:
Արոնյանը Յան Նեպոմնյաշչիի հետ եզրափակիչ` 9-րդ պարտիային ներկայացել է 5,0 միավորով մրցաշարային աղյուսակը գլխավորողի կարգավիճակում: 8-րդ տուրից հետո Լեւոնի մրցակիցը, ինչպես նաեւ Կարլսենը, Կարյակինը եւ Իվանչուկը նրանից ետ են մնում կես միավորով: Իսկ Անանդը 4,0 միավորով վեցերորդն է: Ի՞նչ կլինի, եթե հայ գրոսմայստերն այսօր ոչ-ոքի խաղա: Արդյոք նա կճանաչվի՞ գերմրցաշարի հաղթող: Դա կախված կլինի վերը նշված շախմատիստներից: Եթե նրանցից որեւէ մեկը հաղթի եւ միավորներով հավասարվի Արոնյանին, հաղթողի ճակատագիրը կորոշի կանոնակարգով սահմանված լրացուցիչ հաշվարկների կարգը: Իսկ այն ասում է` հավասար միավորների դեպքում առավելությունը տրվում է այն շախմատիստին, որն այս մրցաշարում ավելի շատ է խաղացել սեւերով: Այնպես որ, հավասարության դեպքում հայ շախմատիստին շրջանցել կարող են Կարյակինն ու Կարլսենը:
Աշոտ ՀԱԿՈԲՅԱՆ
