Հայաստանի բնապահպանության նախարար Արամ Հարությունյանը երեկ «Առավոտ» օրաթերթի հետ զրույցում անդրադառնալով «Ռոբշին» ընկերության հայտարարություններին, թե առաջիկայում դատի է տալու բնապահպանության նախարարությանն իր կրած վնասների համար, ասաց. «Դրանք «Ռոբշինի» հայտարարություններն են, իսկ մեր մասով ասեմ, որ տրամադրված ենք ընկերությանն այլընտրանքային լուծումներ առաջարկել, քանի որ, կառավարության որոշմամբ, Թռչկանը հատուկ պահպանվող տարածքների շարքին է դասվել, ու այնտեղ հիդրոէլեկտրակայան կառուցելու հնարավորություն չկա»:
Թե ինչ այլընտրանքային լուծումներ են առաջարկելու վնասներ կրած «Ռոբշինին», պարոն Հարությունյանն այսպես ասաց. «Այլ տարածքում հիդրոէլեկտրակայան կառուցելու հնարավորություն կտանք կամ էլ, եթե հնարավոր է, ջրվեժի ներքեւի մասում: Այնպես որ, որոշել ենք այս ուղղությամբ աշխատել, իսկ թե ինչ է որոշել ընկերությունը, դա արդեն իրենց գործն է»:
Ա. ՍԻՄՈՆՅԱՆ
«Առավոտ» օրաթերթ
