Գունավոր անձրեւ, փողեր, ձկներ, որդեր, արյուն, կով. այս ամենը տեղացել է երկնքից՝ տարբեր ժամանակահատվածներում:
Որքան էլ տարօրինակ հնչի, կան երկրներ, որտեղ տարիների ընթացքում երկնքից տարբեր միջատներ կամ կենդանիներ են թափվել: Այդպիսի դեպք գրանցվել է, օրինակ, 1997 թվին Ճապոնիայում, որտեղ երկնքից կով է ընկել: Ըստ ճապոնական ձկնորսական նավի տեղեկությունների՝ հանկարծ երկնքից կով է ընկել՝ հարվածելով նավին ու դրա խորտակման պատճառ դարձել: Մոտ երկու շաբաթ անց ռուսական օդային ուժերը ճապոնացիներին տեղեկացրել են, որ բեռնափոխադրման մասնագիտացված օդանավերի անձնակազմերից մեկը կով է վերցրել՝ պահելով այն ինքնաթիռի թափքում: Եվ քանի որ այդ կովը սկսել է խուճապի մատնվել, ինքնաթիռի անձնակազմը տեսնելով, որ ինքնաթիռը շուտով կորցնելու է հավասարակշռությունը, որոշել է կենդանուն 9.000 մետր բարձրությունից ցած նետել: Այդօրինակ դեպք արձանագրվել է նաեւ ԱՄՆ-ում, որտեղ անձրեւն այս անգամ որդերի տեսքով է տեղացել: Ականատեսը Ջենինգսի ոստիկանության աշխատակից Էլեանոր Բիլն է եղել: Դեպի աշխատավայր գնալու ճանապարհին հանկարծ նրա գլխին որդերի «կծիկ» է ընկել: Այս իրադարձության առնչությամբ հստակ պատասխան դեռ չկա: Նույն երկրում մեկ այլ դեպք գրանցվել է 1976 թվի մարտի իննին, որի ժամանակ երկնքից ոչխարի թարմ մսի կտորներ են թափվել: Այս անգամ դեպքի ականատեսը Ալեն Քրոուչն էր, ով անզեն աչքերով տեսել է, թե ինչպես են վերեւից մսի կտորները ցած ընկնում. պատճառը եւս հայտնի չէ:
2007 թվի ապրիլի 6-ին Արգենտինայի Սալտա մարզում երկնքից անձրեւի հետ սարդեր են թափվել: Դեպքի ականատեսը Քրիստիան Օնետո Գաոնան էր, ըստ որի՝ սարդերը բավականին մեծ էին եւ հասնում էին մինչեւ 4 սմ-ի: Նույն տարի Սիբիրի Օմսկի տարածաշրջանում բազմերանգ եւ տհաճ հոտով ձյուն է տեղացել: Ըստ որոշ աղբյուրների՝ ձյունը նարնջագույն, դեղին եւ կանաչ գույների է եղել: Իսկ Ավստրալիայի Լաջամանու քաղաքի Թանամի անապատի եզրին ձկան անձրեւ է տեղացել: Ականատեսները նշել են, որ հարյուր-հազարավոր փոքր եւ սպիտակ ձկներ էին թափվում երկնքից, որոնց մեծ մասը կենդանի էր: 2007 թվին Գերմանիայում մարդկանց ամենից շատ զարմացրել է այնտեղ տեղացած փողի անձրեւը, քանի որ «ո՞վ է տեսել, որ այս ճգնաժամին փողերն այս ու այն կողմ շաղ տան»: Դեպքի ականատեսը գերմանացի մի վարորդ էր, ով հայելիների միջոցով տեսել է, թե ինչպես են փողերն օդում թռչում: Սակայն նրան այդպես էլ չի հաջողվում բռնել դրանցից գոնե մեկը: Եվ ոստիկանության՝ դեպքի վայր ժամանելուց հետո փողերի ոչ մի հետք անգամ չի լինում: Սարսափելի է, բայց 2008 թվին Կոլումբիայի Լա Սիեռա փոքր համայնքում արյան անձրեւ է տեղացել: Դեպքից անմիջապես հետո այդ անձրեւից նմուշ է տարվել մոտակա մասնագիտացված լաբորատորիա՝ որոշ հետազոտություններ կատարելու նպատակով: Ըստ Լա Սիեռայի քահանայի, դա աստվածային նշան էր՝ ուղղված մարդկանց մեղսունակ ապրելակերպի դեմ: Իսկ մեկ տարի անց՝ 2009 թվին Շոտլանդիայում դոնդողանման նյութի տեսքով անձրեւ է տեղացել, որում գիտնականները որոշ փորձերի հիման վրա ԴՆԹ-ի հետքեր են հայտնաբերել: Սակայն պատճառը մինչ օրս չի բացահայտվել: Ենթադրվում է, որ այդ մածուցիկ նյութը կարող էր լինել գորտերի, ձկնկուլի կամ արծվի փսխանքի հետեւանք: Մասնագետները չեն բացառել նաեւ սնկի կամ երկնաքարի վարկածը:
ԵԼԵՆԱ ՉՈԲԱՆՅԱՆ
«Առավոտ» օրաթերթ
