«Սա երբեւէ կարող է դառնալ օժանդակ արդյունք, որպեսզի Թուրքիան այն եվրոպական իր գործընկերներին կամ շահագրգիռ ուժերին ներկայացնի, որ նման կարգի հարցերում պատրաստ է եւ կարող է գնալ ինչ-որ զիջումների, կարող է երկխոսության մեջ մտնել նաեւ նման ցավոտ խնդիրներում, այդ թվում նաեւ՝ հայ-թուրքական: Բայց Թուրքիան այդպիսի ընդհանուր նպատակ չունի»,- երեկ «Առավոտի» հարցին՝ Թուրքիայի վարչապետ Ռեջեփ Էրդողանի ներողությունը քրդական ջարդերի առիթով կարո՞ղ է նախադեպ դառնալ նաեւ Հայոց ցեղասպանության դեպքում, մանավանդ, որ հայ-թուրքական հաշտեցման գործընթացն ընդամենը սառեցված է, ասաց ՌԱՀՀ փորձագետ Սարո Սարոյանը:
Հիշեցնենք, որ նախօրեին Թուրքիայի վարչապետ Ռեջեփ Էրդողանը ներողություն է խնդրել 1930-ականների վերջերին Դերսիմում թուրք զինվորականների կողմից ավելի քան 13 հազար քրդերի սպանության համար։ Լրատվամիջոցները փաստում են, որ Էրդողանը Թուրքիայի առաջին ղեկավարն է, ով նման քայլ է արել։
Թուրքիայի վարչապետի հայտարարությունը, մեր զրուցակցի հավաստմամբ, քաղաքական որոշակի գործընթացների հետեւանք է՝ կապված Սիրիայում տեղի ունեցող զարգացումների հետ, եւ նպատակ է հետապնդում քուրդ զինյալներին զերծ պահել այդ հարցերում հետագա հավանական պայմանավորվածություններից: Փորձագետը չի բացառում, որ հետագայում, նաեւ հայ-թուրքական հաշտեցման զարգացումներում, Թուրքիան ի ցույց դնի քրդական հարցում իր զիջողականության պատրաստակամությունը, բայց խորհուրդ է տալիս միանշանակ չընկալել կամ հույսեր չկապել պաշտոնական Անկարայի նման կեցվածքի հետ, քանի որ «խնդիրն ավելի շատ ցուցադրությունն է, ոչ թե իրական նպատակը»:
Իսկ ներկա զարգացումների առանցքում հայերի կոտորածների առիթով Թուրքիայի կողմից նման՝ թեկուզ ցուցադրական քայլերի հավանականություն չի տեսնում:
Կարդացեք նաև
Ն. Գ.
«Առավոտ» օրաթերթ
