«Հայացքն» անդրադարձել է նախընտրական ցուցակներին եւ գրել է.«Վերջնականապես որոշվել է. Հանրապետական կուսակցության նախընտրական ցուցակում ոչ մի գործարար չի ընդգրկվելու։ Լինելու է մաքուր քաղաքական ցուցակ։ Բայց այս քայլը զուտ պարզ աչքակապություն է։ Որովհետեւ մեր ունեցած հավաստի տվյալներով՝ ՀՀԿ-ական գործարարներն ու օլիգարխներն իրենց թեկնածությունը դնելու են մեծամասնական ընտրակարգով։ Եվ այսպես՝ ցուցակով «մաքուր» են գնալու, մեծամասնականով՝ «կեղտոտ»: Իսկ խորհրդարանում խառնվելու են իրար։ Ի՞նչ է փոխվում։ Ոչինչ։ Որոշ գործարարներ արդեն վերեւից «դաբրո» են ստացել մեծամասնականով առաջադրվելու համար։ Առայժմ մեզ հայտնի են մի քանի անուններ՝ Աշոտ Աղաբաբյան, Սամվել Ալեքսանյան, Աշոտ Արսենյան։ Նույնիսկ Արզաքանցյանի մասին է խոսք գնում»։
Նույն թերթը նաեւ գրում է.«Ըստ իշխանական կուլիսներում շրջանառվող խոսակցությունների՝ Աջափնյակում ԱԺ մեծամասնական ընտրակարգով պատգամավորության թեկնածու է առաջադրվելու Աջափնյակի թաղապետ Ռուբեն Հովսեփյանը։ Վերջինս գլխավոր դատախազ Աղվան Հովսեփյանի եղբայրն է։ Ռուբեն Հովսեփյանը չի հերքել լուրը։ «Մտադիր եմ առաջադրվել, բայց վերջնական դեռ չեմ որոշել, մի քիչ շուտ է դեռ»,- ասել է թաղապետը՝ ավելացնելով, որ անկուսակցական է։ Նշենք, որ Աջափնյակի թիվ 6 ընտրատարածքից ԱԺ պատգամավոր է ՀՀԿ անդամ Հարություն Փամբուկյանը»։
