«Հայկական ժամանակը» զրուցել է ԱԺ «Օրինաց երկիր»խմբակցության անդամ Հովհաննես Սահակյանի հետ: Հիշեցնելով, որ նոյեմբերի սկզբին Գյումրիի բնակչության հետ հանդիպման ժամանակ պատգամավոր Հովհաննես Մարգարյանն ասել է, թե իրենց ձեռքերն արյունոտ չեն, իրեն ք մարդասպան չեն եւ բաց ճակատով են գնում ընտրությունների, լրագրողը հարցրել է.
– Եթե ասում եք՝ մեր ձեռքերը արյունոտ չեն, ուրեմն գիտեք նաեւ, թե ում ձեռքերն են արյունոտ…
– Ես իրավապահ մարմինների ներկայացուցիչ չեմ, ես խոսում եմ մեր տեսակի մասին։ Իսկ մեր կենսագրությունը բաց է, բոլորիդ աչքի առաջ է։ Բոլոր քաղաքական ուժերին կարող եք իրենց մասով հարցնել։ Բայց մենք խոսել ենք մեր տեսակի մասին՝ երբեւէ չմատնանշելով քաղաքական ուժերի։ Եվ ընդհանրապես չենք ասել այլ քաղաքական ուժերը էսպես են, մենք այսպես ենք։
– Ձեր կարծիքով, ովքե՞ր են մարդասպան։
Կարդացեք նաև
– Ես էդպիսի կարծիք արտահայտելու իրավունք չունեմ, որովհետեւ ես իրավապահ ուժերի ներկայացուցիչ չեմ եւ չեմ կարող ասել՝ որ ուժերում նման մարդիկ կան։
– Իսկ դա չի՞ ենթադրում, որ ձեր մարդասպան չլինելու մասին էլ պետք է խոսեք միայն իրավապահ մարմիններին ցուցմունք տալիս։
– Ոչ, ներողություն։ Սխալվում եք։ Մենք քաղաքական ուժ ենք, հանդիպումների մեջ խոսում ենք մեր ընտրազանգվածի հետ, խոսում ենք մեր տեսակի մասին, խոսում ենք մեր կատարած աշխատանքների մասին, խոսում ենք այն ամեն մասին, ինչպես ենք մտածում եւ ընդհանրապես՝ հիմա, վաղ եւ ապագայում։ Սրա մասին է խոսքը։ Եվ եթե դուք ուշադիր լինեք, բոլոր ուժերն էլ իրենց քարոզարշավի ընթացքում իրենց ընտրազանգվածի հետ խոսում են իրենց տեսակի մասին։
– Հնարավո՞ր է՝ ձեր ընտրողները, որոնց հետ հանդիպում եք, մտածում են, որ ձեր ձեռքերը արյունոտ են եւ դուք նրանց հակառակը համոզելու կարիք ունեք։
– Մեր ընտրազանգվածից նույնիսկ շատերը չգիտեն՝ որ օրենսդրական նախաձեռնությունն ենք մենք արել, որը մենք չենք արել։ Մենք ամեն ինչի մասին էլ խոսում ենք իրենց հետ եւ դա արդարացված է եւ ճիշտ է։ Եթե ես չտամ բացատրություն իմ ընտրողին, ապա ո՞վ պետք է տա։
