BBC-ի ռուսական ծառայության մատուցմամբ՝ Մասաչուսեթսում գործունեություն ծավալող Universal Trading & Investment Co. (UTICo) ընկերությունը Նյու Յորքում դատական հայց է ներկայացրել Ուկրաինայի նախկին վարչապետ Յուլիա Տիմոշենկոյի դեմ: Դա տեղի է ունեցել երեք շաբաթ անց այն բանից, երբ Կիեւի դատարանը նախկին վարչապետին դատապարտեց 7 տարվա ազատազրկման:
Բանն այն է, որ UTICo-ն, որը իրավաբանական եւ առեւտրային խորհրդատվական ծառայություններ է մատուցում, վաղուց է, ինչ լուրջ հակասություններ ունի Տիմոշենկոյի հետ, ով ժամանակին վերահսկում էր «Ուկրաինայի միասնական էներգետիկ համակարգեր» ընկերությունը: Վերջինս UTICo-ի հետ երկարատեւ դատական պրոցեսում պարտություն էր կրել, բայց այդպես էլ չէր վճարել դատարանի կողմից հօգուտ UTICo-ի որպես փոխհատուցում սահմանված ավելի քան 18 մլն դոլարը:
Դեռ 1997-ի սեպտեմբերի 26-ին «Ուկրաինայի միասնական էներգետիկ համակարգերը» Բոստոնում դատական հայց էր ներկայացրել UTICo-ի դեմ՝ վերջինին մեղադրելով ընկերությանը «մրոտելու» մեջ: 1998-ի հունվարի 23-ին UTICo-ն հանդես էր եկել հակընդդեմ հայցով՝ Տիմոշենկոյի ընկերությանը մեղադրելով պայմանագրի խախտման, դատական ծախսերը վճարելուց հրաժարվելու եւ ընկերության հեղինակությանը վնասելու մեջ: 2005-ին Բոստոնի դատարանն այս գործով որոշում էր կայացրել. պարտված կողմը՝ «Ուկրաինայի միասնական էներգետիկ համակարգեր» ընկերությունը, UTICo-ին պետք է վճարի ավելի քան 18,34 մլն դոլար, որը Տիմոշենկոն այդպես էլ չի վճարել:
Հայցվորի դիմումում նշված է, որ Տիմոշենկոն օգտվելով իր դիրքից ու կապերից՝ կարողացել է «Ուկրաինայի միասնական էներգետիկ համակարգեր» ընկերության շահույթները տարրալուծել օֆշորներում այնպես, որպեսզի ընկերությունից հնարավոր չլինի գանձել ԱՄՆ դատարանի կողմից սահմանված միլիոնների հասնող տուգանքը:
Կարդացեք նաև
Ամերիկյան գործող օրենսդրության համաձայն՝ Տիմոշենկոյի փաստաբանները պետք է UTICo-ի հայցի վերաբերյալ իրենց պատասխանը ներկայացնեն հայցը ներկայացնելուց 21 օր հետո: Տիմոշենկոն, ի դեպ, արդեն հայտարարել է, թե պատրաստվում է անձամբ ներկայանալ նյույորքյան դատական պրոցեսին:
