Այսօր «Հայելի» ակումբում հրավիրած ասուլիսի ժամանակ ի պատասխան ՀՅԴ պատգամավոր Լիլիթ Գալստյանի այն ասածներին, թե մեր երկրում կոռուպցիան շարունակում է բարգավաճել, արտագաղթը, անցյալ տարվա նույն ժամանակահատվածի հետ համեմատած՝ աննախադեպ ցուցանիշների է հասել, իսկ բանակում տիրող իրավիճակն էլ օր օրի վատթարանում է, ԱԺ ՀՀԿ խմբակցության անդամ Արտակ Զաքարյանն ասաց. «Մեր երկրում բարեփոխումներ իրականանում են: Եվ արդեն իսկ կան ոլորտներ, որ այդ բարեփոխումներն իրենց արդյունքը տալիս են: Առաջիկայում այդ բարեփոխումները էապես փոխելու են հասարակական հարաբերությունները եւ պետություն-հասարակություն սոցիալական խնդիրներն ու ժողովրդավարությունը շատ ավելի առարկայական է դառնալու: Ասել, որ մեր երկրում տնտեսական ռեպրեսիաներ կան, նշանակում է խոսել մեկ այլ երկրի մասին»:
Ինչ վերաբերում է Լիլիթ Գալստյանի հրապարակած այն տվյալներին, որ մի շարք հեղինակավոր կազմակերպությունների գնահատականներով Հայաստանը բացասական ցուցանիշներ է արձանագրել, պարոն Զաքարյանն այդ հետընթացը պայմանավորեց տնտեսական ճգնաժամով: «Եթե տնտեսական ճգնաժամն էլ չլիներ, ինչի՞ց պետք է կառչեին մեր իշխանությունները,- հակադարձեց տիկին Գալստյանը.- Ես այս ցուցանիշները մեր խմբակցությունից չեմ բերել, մեր հանրապետության գնողունակության 86 %-ը մայրաքաղաքում է իրականացվում, իսկ գյուղական շրջաններում մարդիկ գամված են աղքատության եւ լավագույն դեպքում խաշած կարտոֆիլ են ուտում: Սա արժանապատիվ պետություն չէ»:
Լուսինե ԲՈՒԴԱՂՅԱՆ
