Տեղեկացրել ենք, որ «Ջի դիզայն գրուպ» կազմակերպությունը լիազորվել է վերավաճառելու Google-ի ապրանքանիշերից մեկը` google apps-ը, որը ներառում է մի քանի բիզնես ծրագրեր: Կազմակերպության տնօրեն Գրիգոր Սեմիրջյանն այսօր «Հայելի» ակումբում, լրագրողների հետ հանդիպման ժամանակ, ներկայացնելով Google Apps for business ներկայացրեց փաթեթի առավելությունները, ընդգծեց, որ Google-ը Հայաստանում քիչ է ներգրավված, եւ վիճակը բարելավվելու համար պետք է քայլեր արվեն: Գ. Սեմիրջյանը նշեց, որ իրենք առաջին ընկերությունն են՝ լիազորված Google-ի կողմից, որը Հայաստանում կզբաղվի Google Apps Reseller ծրագրով. «Google Apps for business համակարգի միջոցով փոքր գումարով կարողանում ես զարգացնել քո բիզնեսը: Մեր մասնագետը վերապատրաստումից հետո կսկսի թրեյնինգների գործընթացը, որի միջոցով կարող ենք հասանելի դարձնել համակարգը: Մեր թիրախային խմբերն իրականում խոշոր ընկերություններն են, որոնք գումար ներդնելով, կհասնեն ցանկացած արդյունքին»,– ասաց կազմակերպության ղեկավարը:
«Ջի դիզայն գրուպի» առաջխաղացման մասնագետ Արմեն Սարգսյանի խոսքով՝ Հայաստանի հանդեպ հետաքրքրությունը Google-ի կողմից փոքր է. «Բոլորս նկատել ենք Google.am-ի որոնման հաջորդականության բավականին վատ դասավորվածությունը: Դրանից է, որ եթե արտերկրում, օրինակ՝ Google.com-ում կամ եվրոպականում, օգտատերերի միայն 10%-ն է 2-րդ էջից հետո ինչ-որ բան որոնում, Հայաստանում այդ թիվը բավականին մեծ է: Կան համակարգեր, որ Հայաստանում ընդհանրապես ներառված չեն: Այս քայլով փորձել ենք Google-ի ուշադրությունը բեւեռել Հայաստանի վրա»:
Լուսինե ԽԱՉԱՏՐՅԱՆ
