Ադրբեջանում գտնվող հայ ռազմագերիներն ու քաղաքացիական անձինք ավելի մեծ թիվ են կազմում, քան ներկայացնում է պաշտոնական Բաքուն, «Ազատություն» ռ/կ-ի հետ զրույցում ասել է Հայաստանի գերիների, պատանդների եւ անհայտ կորածների հարցերով հանձնաժողովի աշխատանքային խմբի ղեկավար Արմեն Կապրիելյանը:
«Խոսքը վերաբերում է նաեւ նախկին տարիներին գերեվարված մեր հայրենակիցներին»,- պարզաբանել է Կապրիելյանը՝ նշելով, որ ադրբեջանական կողմը խոսում է միայն 8 հոգու մասին՝ 3 ռազմագերու եւ 5 հոգիանոց մի քաղաքացիական ընտանիքի մասին, որի՝ Ադրբեջանում գտնվելու փաստը պաշտոնական Բաքուն հաստատում է:
Գերիների, պատանդների եւ անհայտ կորածների հարցերով հանձնաժողովի աշխատանքային խմբի ղեկավարը կոնկրետ թվեր չի հրապարակել, սակայն ասել է, թե հայկական կողմն ունի Ադրբեջանում պահվող մի քանի տասնյակ հայերի մասին տեղեկատվություն եւ աշխատում է այդ ուղղությամբ:
«Առավոտ» օրաթերթ
