«Թողնեիք տանը մարդավարի մահանայի»

Պրոֆեսոր Ղազարյանի մահվան պատճառը հարազատները համարում են բժշկական սխալը

 Երեւանի պետական համալսարանի հայոց լեզվի պատմության ամբիոնի ղեկավար, դոկտոր-պրոֆեսոր Ռուբեն Ղազարյանի ընտանիքն ու ողջ ուսանողությունը վրդովված է:

71-ամյա պրոֆեսորը մահացել է վիրահատությունից մի քանի օր հետո:

Քանաքեռ-Զեյթուն բժշկական կենտրոնի ուրոլոգիայի բաժանմունքում, պրոֆեսոր Աշոտ Արտավազդի Ծատուրյանը լեզվաբանին ենթարկել է միզապարկի վիրահատության:

Պրոֆեսորի դստեր՝ Իրինա Ղազարյանի տեղեկացմամբ, հոկտեմբերի 27-ին, երբ հորը տանում էին վիրահատարան, բժիշկը հավատացրել է, որ ամեն ինչ բարեհաջող կլինի, քանի որ ըստ բժշկի «մետաստազներ չեն հայտնաբերվել»:

Վիրահատությունից մի քանի օր հետո Ռուբեն Ղազարյանին կրկին վիրահատել են: Վիրահատությունը տեւել է 3 ժամ:

Այնուհետեւ Ղազարյանը տարվել է վերակենդանացման բաժանմունք:

Հարազատների եւ ուսանողների պնդմամբ, Ղազարյանն առույգ էր, առողջության հետ կապված խնդիրներ չի ունեցել մինչ բուժհիմնարկ գնալը:

Պրոֆեսորի վերջին խոսքն է եղել. «Թողնեիք տանը մարդավարի մահանայի»:

Այսօր մեր հետ զրույցի ժամանակ Ռուբեն Ղազարյանի սգակիր դուստրը հայտնեց, որ իր փաստաբանի միջոցով դիմելու է ոստիկանությանը կատարվածին իրավական գնահատական տալու համար:

Ռուզան ՄԻՆԱՍՅԱՆ