Երեկ www.aravot.am-ում, իսկ այսօր «Առավոտ» թերթում տեղեկացրել ենք, որ Սյունիքի մարզի Քաջարան գյուղում խիստ լարված իրավիճակ է: Քաջարանի գյուղապետ Ռաֆիկ Աթայանի (լուսանկարում) փոխանցմամբ, Քաջարանում գործող Զանգեզուրի պղնձամոլիբդենային կոմբինատի ղեկավարությունը ճնշումներ է գործադրում բնակիչների վրա, նույնիսկ սպառնում է գյուղ իրավապահ մարմիններ ուղարկել, տեխնիկա ուղարկել աշխատելու, եթե բնակիչները չստորագրեն պայմանագրերը: Հիշեցնենք, որ կառավարության ապրիլի 28-ի 627-Ն որոշմամբ` Քաջարան գյուղի 181,7 հա հողատարածքը, որի մեջ, ըստ գյուղապետի, նաեւ գյուղի գերեզմանն է, Զանգեզուրի պղնձամոլիբդենային կոմբինատին է հատկացվել հանքարդյունաբերական նպատակով (https://www.aravot.am/2011/11/23/9805/ եւ https://www.aravot.am/2011/11/24/10137/):
Խնդրով մտահոգ բնապահպանական կազմակերպությունները ֆիլմ են պատրաստել Քաջարան գյուղի բնակիչների մտահոգությունների, գյուղի խնդիրների և այն հողատարածքների մասին, որոնք ապօրինի խլվել են քաջարանցիների ձեռքից: Ում հետաքրքիր է գյուղն ու գյուղի ճակատագիրը կարող է ֆեյսբուքում փնտրել այն SOS QAJARAN անվամբ:
