Ներկայումս շուրջ 7 հազար մարդ է պահվում Լիբիայի բանտերում`զրկված լինելով դատարանի առաջ կանգնելու հնարավորությունից: Այդ մասին ասված է նոյեմբերի 28-ին ՄԱԿ-ի Անվտանգության խորհրդի նիստում քննարկվելիք զեկույցում, որից մեջբերումներ է արել France-Presse-ը:
Փաստաթղթում նշվում է, որ քաղաքական բանտարկյալները, որոնք բանտարկվել էին Մուամմար Կադդաֆիի իշխանության օրոք, վերջինիս տապալումից հետո ազատ են արձակվել, բայց նրանց փոխարեն բանտարկվել են նոր կալանավորներ, որոնք գտնվում են տարբեր «հեղափոխական բրիգադների» կողմից վերահսկվող բանտերում եւ չունեն արդար դատարանի առաջ կանգնելու հնարավորություն: Զեկույցում նաեւ ընդգծված է, թե կալանավորներից շատերը, այդ թվում` կանայք եւ երեխաներ, ենթարկվում են դաժան վերաբերմունքի եւ կտտանքների: Կալանավորների զգալի մասը Կադդաֆիի կողմից աֆրիկյան երկրներից բերված վարձկաններ են, որոնք հետապնդվում են իրենց մաշկի մուգ գույնի համար:
Փաստաթղթում առանձին անդրադարձ կա Տավերգա քաղաքում տիրող իրավիճակին, որի բնակչությանը «հեղափոխականները» զանգվածաբար մեղադրել են Կադդաֆիի նկատմամբ չեզոք վերաբերմունքի մեջ: Կադդաֆիի ռեժիմի տապալումից հետո ապստամբները քաղաքի բնակիչներին կալանավորել են հենց տներից եւ հիվանդանոցներից եւ առանց դատի բանտարկել, ապա ենթարկել են կտտանքների կամ մահապատժի:
ՄԱԿ-ի զեկուցողները շեշտել են, որ թեեւ Լիբիայում արդեն սկսվել է բանտերը ապստամբների խմբավորումների վերահսկողությունից երկրի նոր կառավարությանը փոխանցելու գործընթացը, այդուհանդերձ, կալանավորների իրավունքերը պաշտպանելու ուղղությամբ «դեռ շատ անելիքներ կան»:
