«Գիսանե» երիտասարդական հանրապետական թատերական փառատոնը, որը մեկնարկել էր նոյեմբերի 10-ին, փակեց իր էջը:
Փառատոնի ժյուրիի գնահատող հանձնախմբի 9 անդամները այդ օրերի ընթացքում քննարկել են բոլոր 17 ներկայացումները եւ որոշել մրցանակակիրներին. «Այս փառատոնն աչքի է ընկնում իր համարձակությամբ: Սպասում էինք, թե կլինեին ավելի թույլ աշխատանքներ, սակայն, բոլորն էլ մեկը մեկից հետաքրքիր եւ բովանդակալից էին »,- ասում է Լեւոն Իվանյանը: Նշում է` իրենց համար բարդ էր մրցանակային կարգեր որոշելը:
Երեւանի թատրոնի եւ կինոյի պետական ինստիտուտի ռեկտոր Արմեն Մազմանյանն էլ ասում է`հաջորդ տարվա փառատոնին սպասվում են մի շարք փոփոխություններ. «Երիտասարդները կներկայանան փառատոնին հեղինակային ֆիլմերով: Ժամկետային փոփոխություններ էլ կլինեն «Գիսանեի» շրջանակներում: Այն կանցկացվի մարտի 20-31 ընկած ժամանակահատվածում, որն էլ կհամընկնի թատրոնի միջազգային օրվան»,- ասում է նա:
«Առավոտ երիտասարդականի» հարցին` ինչպես է վերաբերում, որ իր թատրոնի երիտասարդ դերասանները, ռեժիսորները դարձել են սերիալ կերտողներ եւ մարմնավորողներ, Մազմանյանը պատասխանում է. «Ինձ մոտ այս տարվանից արգելված է մինչև երրորդ կուրսի ավարտը մասնակցել որևէ սերիալի կամ մրցույթի նկարահանումներին: Իսկ, եթե որևէ մեկը կփորձի խախտել որոշումը, լուրջ խնդիրներ կունենա»,-ասում է Մազմանյանը` վստահեցնելով, որ կլինեն նաև բացառություններ: «Օրինակ` եթե Վիգեն Չալդրանյանը դիմում գրի որևէ երեխայի համար, չի բացառվում , որ կքննարկեմ, բայց մնացած դեպքերում այդ մասին խոսք անգամ լինել չի կարող»:
Պերճուհի Գեւորգյան
