«ՀՀ առաջին նախագահը կադրեր ընտրեց հին որսագողից լավ անտառապահներ դուրս կգան սկզբունքով, որը չգործեց: Երկրորդ նախագահի ժամանակ շատ կանոններ մշակվեցին՝ քաղծառայության, պետական ծառայության հետ կապված: Իսկ երրորդ նախագահի օրոք ընտրվեցին ոչ կուսակցական եւ պրոֆեսիոնալ կադրեր »,- այսօր Մամուլի ազգային ակումբում կադրային քաղաքականության մասին քննարկման ժամանակ պատմական էքսկուրս արեց ՀՀԿ պատգամավոր Արտակ Դավթյանը: Ըստ նրա, կադրային խնդրի լուծումը հետեւյալն է, որ այն անձինք, ովքեր գործադիրում պաշտոնների կանցնեն՝ պետք է դադարեցնեն կուսակցական գործունեությունը, նույնիսկ դուրս գան անդամակցությունից:
Ըստ ՀՅԴ խմբակցության պատգամավոր Լիլիթ Գալստյանի, անցած 20 տարվա ընթացքում կադրեր ընտրվել են մի սկզբունքով՝ «Որքան հավատարիմ կլինես ընտրական գործընթացին, ըստ այդմ կլինի քո հատուցումը: Շատերը նախիրի պես մտնում են այս կամ այն կուսակցություն՝ առանց նույնիսկ իմանալու, թե դա որ կուսակցությունն է: Մեկը մտածում է, որ իր դարպասի դուռը կկառուցվի, մյուսը՝ որդուն բանակից կփախցնի , այսինքն՝ կամավոր ստրկամտությամբ են գնում: Արդյունքում՝ մանկապարտեզի դայակներից մինչեւ դպրոցի տնօրեններ նախընտրական շտաբներում են եւ իրենց օձիքի տակ 6 կուսակցության նշան ունեն: Մարդիկ վստահ են, որ պիտի համակրես իշխանությանը, որ քո տեղն ունենաս արեւի տակ»:
«Ժառանգության» պատգամավոր Արմեն Մարտիրոսյանը կարծում է, որ մեր երկրում պաշտոնները զբաղեցնում են մարդիկ, որոնք ուզում են իշխանության միջոցով տիրանալ տնտեսությանը. «Եթե բիզնեսը տարանջատվի տնտեսությունից, ամեն ինչ կընկնի իր տեղը»:
Հռիփսիմե ՋԵԲԵՋՅԱՆ
