Երկուշաբթի օրը Իսպանիայի թագավոր Խուան Կառլոսը, ըստ ABC լրատվական գործակալության, հայտնվել է պաշտոնական հանդիպման՝ աչքի տակ կապտուկով եւ ջարդված քթով: 73-ամյա թագավորն ասել է, որ այդ վնասվածքները ստացել է, երբ պատահմամբ գլուխը խփել է դռան եզրին: Չնայած դիպվածին՝ նա ներկայացել է նախատեսված հանդիպմանը, որի ժամանակ Սուդանի, Բելգիայի, Մալազիայի, Հնդկաստանի եւ Կիպրոսի նոր դեսպանները նրան պիտի հանձնեին իրենց հավատարմագրերը: Հանդիպումից հետո, պատասխանելով լրագրողների հարցին, թե՝ ի՞նչ է պատահել, որ նման տեսք ունի, թագավորն ասել է.«Ահա թե ինչ է լինում, երբ «հագնում ես» դռանը»:
Խուան Կառլոսին, կարելի է ասել, նման դիպվածներն ուղղակի հետապնդում են: 1981 թվականին իսպանական միապետը կրկին գլխով «հագել էր» դռանը, որն, ավաղ, ապակեպատ էր եղել, եւ թագավորական ծանր գլխի հարվածից կոտրվել էր: Արդյունքում՝ թագավորը բազմաթիվ քերծվածքներ էր ստացել, այդ թվում՝ լուրջ վնասվածքներ, որոնց պատճառով որոշ ժամանակ ստիպված էր հիվանդանոցում անցկացնել:
Բացի այդ, Խուան-Կառլոսը, որը լեռնադահուկային սպորտի եւ որսորդության հայտնի սիրահար է, մի քանի անգամ վնասվածքներ է ստացել իր այդ հրապուրանքների պատճառով:
