«Առաջին անգամ եմ լսում Լիլիթի երգերը և շատ տպավորված եմ: Մինչ այդ մեր շփումը եղել է որպես լրագրող և երգիչ»,-ասում է երգչուհի Շուշան Պետրոսյանը:
Այսօր` նոյեմբերի 22-ին, «Golden Tulip» հյուրանոցային համալիրում կայացավ Լիլիթ Բլեյանի ձայնասկավառակի շնորհանդեսը:
«Ուրիշ քաղաքում» ձայնասկավառակի նպատակն է ներկայացնել իմ երգերը, որոնք տարիների ընթացքում գրել եմ և սպասել արձագանքին: Նրանք ինձ համար շատ թանկ են»,-«Առավոտ երիտասարդականի» հետ զրույցում ասում է Լիլիթը: Նա կարծում է, որ այն կծառայի իր նպատակին:
Սկավառակի մեջ ներառված է ինը երգ, ութը` հայերեն, իններորդը` «Սպասվող գնացքներ» երգի իսպաներեն թարգմանված տարբերակն է:
Շնորհանդեսին մասնկացում էին շոու-բիզնեսի մի շարք ներկայացուցիչներ, արվեստագետներ և այլ մասնագիտությունների տեր մարդիկ: Եկել էին ծանոթանալու նրա արվեստին: Երգիչ Էրիկը հուսով է, որ Լիլիթը իր տեղը կունենա մեր երգարվեստում, ցանկանում է նրան շարունակական գործունեություն: «Դու պետք է երգես քո գրած երգերը»,-ասում է Ռուբեն Հախվերդյանը: «Առավոտ երիտասարդականին» էլ երգիչն ասում է` «Լիլիթը շատ հմայիչ է»:
Դերասանուհի Նազենի Հովհաննիսյանն էլ կարծում է. «Նրա երգերը տարբերվում են մնացածի երգերից նրանով, որ նախ սա պոպուլյար արվեստ չէ, այլ հեղինակային երգի ուղղություն»:
Պատրաստեց` Արամ Արարատյանը
