Վրաստանի նախագահ Միխայիլ Սահակաշվիլին հայտարարել է, որ պատրաստ է հրաժարվել իր մարմնի որոշ մասերից՝ կորցրած տարածքների փոխարեն: Ակնհայտորեն՝ նա նկատի ուներ Աբխազիան եւ Հարավային Օսեթիան: Նման հայտարարությամբ, ըստ «Նովոստի-Գրուզիա» լրատվական գործակալության, Վրաստանի նախագահը հանդես է եկել հանրապետության կառավարության նիստի ժամանակ, որը տեղի էր ունենում Քութաիսի քաղաքում:
Իր այս «առաջարկը» Սահակաշվիլին հասցեագրել է ռուսաստանյան իշխանություններին, հիշեցնելով, որ իր հասցեին Ռուսաստանի Դաշնության ղեկավարության կողմից հնչել են անբարեհաճ արտահայտություններ եւ սպառնալիքներ:
«Նրանք ուզում են Վրաստանի առաջնորդներին կախել՝ ինչ-որ մարմնի մասերից: Ես մեծ հաճույքով պատրաստ եմ իմ մարմնի ցանկացած մաս ուղարկել նրանց պայմանով, որ նրանք վերադարձնեն մեր տարածքների թեկուզ մի մասը: Իսկ ավելի լավ է՝ ողջ տարածքները: Եվ իմ մարմնամասերը կհերիքեին այնքան, որքան ես կվերադաձնեի տարածքներ»,-հայտարարել է երկրի նախագահը:
Ռուսաստանից այս հրապուրիչ առաջարկին դեռ չեն պատասխանել:
Կարդացեք նաև
Ի դեպ, ինչ վերաբերում է ՌԴ-ից՝ Սահակաշվիլու հասցեին հնչած սպառնալիքներին: Ըստ lenta.ru-ի՝ ֆրանսիական Nouvel Observateur ամսագիրը հրատարակել էր հոդված, որում ասվում էր, որ ՌԴ վարչապետ Վլադիմիր Պուտինը Ֆրանսիայի նախագահ Նիկոլա Սարկոզիի ներկայությամբ դեռ 2008-ի օգոստոսին, երբ ՌԴ եւ Վրաստանի միջեւ պատերազմ սկսվեց, սպառնացել էր «կախել Սահակաշվիլիին մարմնի որոշակի հատվածներից»: Ավելի ուշ, մի հրապարակային հաղորդման ընթացքում ՌԴ վարչապետին հարց ուղղվեց՝ ճի՞շտ է, որ նա խոստացել է Սահակաշվիլիին կախել մի մարմնամասից: Պուտինն էլ, թե՝ «իսկ ինչո՞ւ մի»:
Սա դարձել էր քաղաքական հումորի թեմա: Սահակաշվիլին մի անգամ ուկրաինական հեռուստատեսությանը տված հարցազրույցում ասել էր.«Պուտինը խոստացել է ինձ կախել իմ մարմնի որոշ մասերից, որոնց մասին ես հիմա չեմ խոսա, բայց որոնք անհրաժեշտ են յուրաքանչյուր տղամարդու, հատկապես՝ քաղաքական գործչին, եւ անգամ՝ կին- քաղաքական գործչին»:
