«Թիկնազորը բավականաչափ քաղաքական գործոն է ե՛ւ ընտրություններում, ե՛ւ ընտրությունները կեղծելու գործընթացում, ե՛ւ արտաընտրական որոշակի հարցերում»,- այսօր «Հայելի ակումբում», խոսելով «Թիկնազորի մասին» օրենքի մասին, ասաց «Ազատ դեմոկրատներ» կուսակցության փոխնախագահ Անուշ Սեդրակյանը: Նրա կարծիքով, Հայաստանում թիկնազորն իրականացնում է ծպտված կրիմինալ գործառույթներ, եւ մեզանում թիկնապահը ոչ թե միտված է կյանք պաշտպանելուն, այլ որոշակի նախաձեռնողական գործողություններ անելուն. «Ումի՞ց է պաշտպանվում խոշոր բիզնեսը, ինչի՞ համար խոշոր բիզնեսը պարտավոր է եւ պետք է ունենա թիկնապահներ: Կա՛մ այդ ունեցվածքի կուտակման ճանապարհը թափանցիկ չէ, կրիմինալ է, հետեւաբար բիզնեսը ստիպված է այդ կրիմինալ բիզնեսը պաշտպանել կրիմինալ ձեւով կամ էլ պետական մեքենան չի կարող ապահովել համապատասխան պաշտպանություն»:
ԱԺ ՀՀԿ պատգամավոր Կարինե Աճեմյանը շեշտեց, որ պետական պաշտոնյան նշված օրենքով իրավունք չունի օգտվել թիկնապահի ծառայությունից, եւ խոսքը վերաբերում է միայն ֆիզիկական եւ իրավաբանական անձանց. «Իրականում եվրոպական երկրներում այս ծառայությունից օգտվում են խիստ անհրաժեշտության դեպքում, մեզ մոտ, ցավոք սրտի, հասարակության մեջ դիրք գրավող մարդիկ, երբեմն բարդույթներից ելնելով, առավելությունը, հարստությունը առանձնացնելու պատճառով, չարաշահում են այս կառույցը»:
Լուսինե ԽԱՉԱՏՐՅԱՆ
Կարդացեք նաև
