Այս տարվա մայիսին «Առավոտը»/«Որ մին զարկի դառնա…65 հազար»/ անդրադարձավ ոստիկանության կազմակերպված հանցագործությունների դեմ պայքարի գլխավոր վարչության 4-րդ վարչության նախկին պետ Նազար Մնացականյանի հետ կապված պատմություններից մեկին:
Իրանից վերադառնալուց հետո «Զվարթնոց» օդանավակայանում կալանավորվել էր «ՔիմՏեխ» սահմանափակ պատասխանատվության ընկերության տնօրեն Սամվել Խաչատրյանը, որը կասկածվել էր թմրամիջոցների ապօրինի շրջանառության եւ ապօրինի արտադրության մեջ:
«Առավոտը» տեղեկացրել էր, որ Սամվել Խաչատրյանը օդանավակայանից տարվել էր Նազար Մնացականյանի քննչական վարչություն: Այդտեղ էլ անհետացել էր տնօրենի պայուսակում գտնվող 65 000 դոլար գումարը:
Արձանագրություն չէր կազմվել, չէին գրանցվել Խաչատրյանի անձնական իրերը:
Կարդացեք նաև
Մեր տեղեկություններով, այդ կապակցությամբ սկսվել էր անգամ ծառայողական քննություն: Սակայն նոր ոստիկանապետի հրամաններից մեկով Նազար Մնացականյանն ազատվել է, չնայած Նազարն ասել էր՝ իր դեմ խաղ չկա:
«Առավոտի» տեղեկություններով, ոստիկանապետ Վովա Գասպարյանը հանել է նաեւ Նազար Մնացականյանի ղեկավարած վարչության այն աշխատակիցների գործերը, որոնք նրա օրոք հանկարծակի ազատվեցին՝ «սեփական դիմումների» համաձայն:
3 ամիսների ընթացքում 7 փոխգնդապետ է ազատվել, սա այն դեպքում, երբ փոխգնդապետները պարգեւատրվում եւ խրախուսվում էին մինչ ազատումը:
Ռուզան ՄԻՆԱՍՅԱՆ
