«Առավոտը» դժգոհություն էր ստացել Կոտայքի մարզի մի բնակչից այն մասին, որ իբր Հայաստանի ամերիկյան համալսարանի գրադարանում իրեն մերժել էին գրքեր տրամադրել՝ պատճառաբանելով նրա ոչ երեւանյան գրանցումը:
Համալսարանի մամուլի պատասխանատու Դիանա Մանուկյանը «Առավոտի» հետ զրույցում բացառեց նման դեպքերը, ասելով, որ ընդհակառակը, իրենք քաջալերում են Ամերիկյան համալսարանի գրադարանից օգտվելը, քանի որ դրանով նաեւ իրենց աշխատանքի արդյունավետությունն է փաստվում: Գրադարանի տնօրեն Բելլա Ավագյանն էլ հավելեց, որ եթե տարիներ առաջ որոշ գրքերի փոքր թվի պատճառով ինչ-ինչ սահմանափակումներ եղել են, ապա այսօր հենց համալսարանի քաղաքականությունից է բխում, որ գրադարանը բաց լինի բոլորի առաջ ու մատչելի՝ լայն հանրությանը: «Մենք սպասում ենք բոլորին, ուրախ ենք սպասարկել: Ընդամենը գրանցվելու համար հայկական անձնագիր ունեցողները պետք է վճարեն 1000 դրամ, իսկ օտարերկրացիները 40 դոլարի չափով դեպոզիտ, որը վերադարձվում է, եթե պարտքեր չունեն եւ խնդիրներ չեն առաջացել»,- նշեց տիկին Ավագյանը:
ԳՈՀԱՐ ՀԱԿՈԲՅԱՆ
«Առավոտ» օրաթերթ
