Կալանավորի հայրը դիմել է հանրապետության նախագահին, ազգային անվտանգության ծառայությանը, գլխավոր դատախազին ու ոստիկանապետին:
Հոկտեմբերի 10-ին Կենտրոն եւ Նորք-Մարաշ վարչական շրջանների ընդհանուր իրավասության դատարանում դատավոր Մնացական Մարտիրոսյանի նախագահությամբ ավարտվեց Մհեր Համբարձումյանի, Տարոն Խաչատրյանի գործը: «Առավոտն» այս գործի մասին տեղեկացրել է, մասնավորապես, անդրադառնալով ոստիկանների կողմից բերման ենթարկելու իրավաչափությանը. ոստիկանները կրակել էին բերման ենթարկվողի՝ Մհեր Համբարձումյանի վրա:
Մհեր Համբարձումյանը դատապարտվել է 6 տարվա ազատազրկման, եւ մեղադրվել էր անցյալ տարվա դեկտեմբերի 13-ին ոսկու շուկայի աշխատակցուհի Լուսինե Մանուչարյանի պայուսակը հափշտակելու համար: «Դատաքննության ժամանակ ոստիկանության քրեականի ավագ օպեր-լիազոր Մանվել Հակոբյանն ասաց, որ կատարվածը կողոպուտ է: Հարց է առաջանում, եթե զինված հարձակում չկա կամ որեւէ քաղաքացու վտանգ չի սպառնում, ոստիկանն ինչ իրավունքով է զենքը հանում, իջեցնում պահպանիչը, լիցքավորում, բերում մարտական վիճակի եւ կրակում որդուս վրա: Երեւան քաղաքի դատախազ, մեղադրող Հ. Չախոյանը դատաքննության ժամանակ չհարցրեց՝ արդյոք նա իրավունք ունե՞ր զենք կիրառելու»,- ասում է Մհեր Համբարձումյանի հայրը՝ Ռուբեն Համբարձումյանը: Ի դեպ, նկատենք, որ դեպքի 3-րդ օրը պաշտոնական հաղորդագրություն էր տարածվել, որ ոստիկանները օդ են կրակել: «Օդ կրակելու» օրն էլ Մհեր Համբարձումյանին տարել էին դատաբժշկի մոտ:
Նախաքննությունից 78 օր հետո կողոպուտը որակվել է ավազակային հարձակում: «Ձեւակերպվեց ավազակային հարձակում, երբ չկա ոչ զենք, ոչ էլ մարմնական ծանր վնասվածք»,- ասում է կալանավորի հայրը:
Կարդացեք նաև
Նա հանրապետության բարձրաստիճան պաշտոնյաներին ուղղված նամակում զարմացած հարցնում է, թե ինչո՞ւ գործը չի վերցրվել հատուկ քննչական ծառայության վարույթ կամ ազգային անվտանգության ծառայությունը չի զբաղվում, քանի որ ոստիկանների գործողությունների իրավաչափությունն է վիճարկվել: Ռուբեն Համբարձումյանին անհամոզիչ է թվում նաեւ այն, որ դեպքի ժամին օպեր-լիազոր Մանվել Հակոբյանը 2-3 մետր հեռավորության վրա է գտնվել:
Դատաքննության ժամանակ պաշտպանական կողմը՝ հանրային պաշտպան Անժելա Հոբոսյանը ներկայացրեց մի տեղեկանք, համաձայն որի՝ տուժող Լուսինե Մանուչարյանը չի հանդիսանում «Վաղարշ եւ որդիներ» սահմանափակ ընկերության աշխատակից: Ըստ Երեւան քաղաքի ոստիկանության պետ, գեներալ-մայոր Ներսիկ Նազարյանի 13.12.10 գրության, Լուսինե Մանուչարյանը աշխատել է ոսկու շուկայում որպես վաճառողուհի, եւ որ նույն օրն էլ ծառայողական քննություն է սկսվել ոստիկանների դեմ:
Ավելին, երբ դեպքի օրը շտապօգնության կանչ է գրանցվել ժ.14. 02-ին, իսկ առաջին կլինիկական հիվանդանոցում տուժողը հայտնվել է ժ.15. 50-ին:
«Ես կողմ եմ, որ յուրաքանչյուրը կրի պատիժ իր կատարածի համար, ոչ թե հնարովի հանցագործության համար: Ես բազմազավակ երեխաների հայր եմ, ունեմ 6 երեխա: Մենք հրաժարվում ենք ՀՀ քաղաքացիությունից եւ ցանկություն չունենք ապրելու նեռի ճտերի հետ: Իմ ամենածայրահեղ քայլերի համար պատասխանատու եք դուք: Սա մի ընդունեք որպես վերջնագիր, այլ՝ արդարության հասնելու բողոքի ճիչ»,- գրել էր Ռ. Համբարձումյանը:
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
