Ամիսներ առաջ (06.09.2011) «Առավոտն» իր «Մանկապարտեզի ճամփան դժվար է ու քարքարոտ» հրապարակմամբ անդրադարձել էր Մալաթիա-Սեբաստիա համայնքի Արարատյան զանգվածում գործող թիվ 81 մանկապարտեզի անբարեկարգ ճանապարհին: Նյութում մասնավորապես նշել էինք, որ ճանապարհն այնքան քարուքանդ է, որ փոքրիկներն ընկնում են եւ վնասվածքներ ստանում: Ծնողների պատմելով՝ հատկապես տաք եղանակին մինչեւ հասնում են մանկապարտեզ, ստիպված են լինում մի քանի անգամ երեխաների կոշիկները հանել, քարերը թափել ու նորից հագցնել:
Չնայած վերոնշյալ ճանապարհը մանկապարտեզի կենտրոնական մուտքը չի սպասարկում, սակայն, ծնողների ներկայացմամբ, հետնամասի ճանապարհով նույնպես տասնյակ երեխաներ են գնում-գալիս, քանի որ որոշ բնակավայրերից հենց այդ ճանապարհն է հարմար:
Երեկ «Առավոտի» խմբագրություն դիմած ծնողները հայտնեցին, որ մանկապարտեզի հարակից ճանապահը, որը գտնվում է Վաթյան փողոցում, ասֆալտապատվել է, սակայն իրենց մատնանշած տարածքը կրկին անտեսել են: Ծնողների խոսքերով՝ ասֆալտապատված այդ հատվածը շատ մոտ է քարուքանդ ճանապարհին:
«Առավոտ» օրաթերթ
