Նարինեն սովորում է Հայաստանի պետական տնտեսագիտական համալսարանի 3-րդ կուրսի անվճար համակարգում: 5 տարեկան հասակում ավտովթարի հետևանքով վնասել է աչքերը: Դիմել է մի շարք վիրահատությունների, սակայն բժիշկներին հաջողվել է փրկել միայն մի աչքը , մի աչքում կատարվել է պրոթեզավորում, մյուսով էլ լավ չի տեսնում, կարճատես է: «Հիմնակնում ձայագրում եմ դասախոսությունները, իսկ որոշ առարկաներ պարապելիս օգնում է մայրս: Բայց երբեմն էլ ուղղակի ստիպված խնդրում եմ ընկերներիս, որ իմ փոխարեն նրանք ռեֆերատներ և ստուգողական աշխատանքներ գրեն, ինքս չեմ կարողանում օգտվել ինտերնետից»,-պատմում է նա:
Նարինեն տխրում է `մտածելով, որ իր խնդրանքներով «զզվեցնում» է ուրիշներին:
Այսօր` նոյեմբերի 21-ին, Հայփոստի շենքի առաջին հարկում բացվեց ինտերնետ կենտրոն կույրերի և վատ տեսողություն ունեցողների համար: Կենտրոնն ունի 15 համակարգիչ, որից 5-ը նախատեսված է ընդհանուր տեսողություն չունեցողների, իսկ մյուս 10-ը` վատ տեսողություն ունեցողների համար: Դրանք աշխատում են բրայլյան համակարգով, մոնիտորով և տասախցիկներով, տեքստը վերարտադրում են ձայնային տեսքով: Կա նաև մեկ ինտերակտիվ գրատախտակ:
«Համակարգիչներն աշխատում են անգլերեն և ռուսերեն լեզուներով, բայց նախատեսվում է ներմուծել հայերեն լեզվով ծրագրեր»,-ասաց բացմանը ներկա «Ինտերնետհանրություն» հ/կ-ի փոխնախագահ Գրիգոր Սաղյանը:
Իսկ տրանսպորտի և կապի նախարար Մանուկ Վարդանյանի խոսքով` սա ԱՊՀ երկրների տարածքում առաջին նմանատիպ կենտրոնն է, ապահոված է անհրաժեշտ սարքավորումներով: Կենտրոնը գործելու է բոլոր աշխատանքային օրերին և անվճար է:
Նազենի Բաղդասարյան
