Արդեն հաղորդել ենք, որ այսօր Կոտայքի մարզի Ողջաբերդ գյուղի բնակիչ, 74-ամյա Արամայիս Պապիկյանի եւ 71-ամյա Սեդա Պապիկյանի տանը (երկուսն էլ` թոշակառու) տեղի է ունեցել ավազակային հարձակում : Արամայիս Պապիկյանը մարմնական վնասվածքներով տեղափոխվել է Սուրբ Գրիգոր Լուսավորիչ բժշկական կենտրոն:Դեպքի վայրում հավաքվածները ֆոտոլրագրող Գագիկ Շամշյանին պատմել են, որ Պապիկյանները դաժան ծեծի եւ խոշտանգումների են ենթարկվել. այդ պահին նրանք տանը եղել են մենակ:
Հանցագործները ոչ միայն տակնուվրա են արել տունն ու նկուղը, այլ կատարել են անմարդկային դաժանություններ. վառարանի երկաթյա կրակխառնիչը շիկացրել են ու դրանով ծեծել ամուսիններին, ապա աքցանով քաշել են ամուսինների եղունգները:
Փաստի առթիվ ոստիկանության քննչական գլխավոր վարչության Կոտայքի մարզի քննչական բաժնի քննիչ Արմեն Մարգարյանի կողմից հարուցվել է քրեական գործ` ՀՀ քրօր.-ի 175 հոդվածի 2-րդ մասի 1-ին, 2-րդ, 3-րդ, 4-րդ կետերով (ավազակային հարձակում) եւ 235 հոդվածի 1-ին մասի (ապօրինի զենք, զինամթերք կրելը եւ օգտագործելը) հատկանիշներով, նշանակվել են մի շարք փորձաքննություններ, տուժողներին տրվել է դատաբժշկի ուղեգիր:
