Հոկտեմբերի 2-ին Այրումի սողանքի հետեւանքով խոշոր բեռնատարների համար փակվեց Բագրատաշեն-Ալավերդի-Վանաձոր ճանապարհը: Հանրապետություն բեռներ ներկրող բեռնատարները հիմա երթեւեկում են շրջանցիկ Նոյեմբերյան-Իջեւան-Երեւան ճանապարհով: Այդ պատճառով մեծացել է այս ճանապարհի երթեւեկը: Ծանր բեռնատարներն այդ ճանապարհի Ոսկեպար-Կիրանց հատվածում 5 տեղ քանդել են ասֆալտի շերտը: Այդ ճանապարհին ավելացել է նաեւ ճանապարհատրանսպորտային պատահարների թիվը: Նոյեմբերի 19-ի առավոտյան, 9.30-ի սահմաններում, վրացական համարանիշներով բեռնատարը՝ քանդելով ճանապարհի արգելափակոցը, դուրս էր եկել ճանապարհից: Ազգությամբ վրացի վարորդի խոսքով, մի մարդատար մեքենա վազանցի է դուրս եկել, այդ պահին դիմացից մեքենա է հայտնվել, վթարից խուսափելու համար ինքը ստիպված է եղել կտրուկ աջ թեքել: Նշենք, որ վթարից մեկ օր անց մսով բեռնված «ֆուռը» դեռ նույն տեղում էր:
Ոսկան ՍԱՐԳՍՅԱՆ
