Օրեր առաջ Նոյեմբերյան քաղաքի կենտրոնում, կենցաղի տան մոտ երիտասարդ աղջկա վարած «Մերսեդեսը» հարվածել էր կայանած մի մեքենայի: Պարզվում է՝ վթարի պատճառը քաղաքի ջրային ցանցում առկա վթարն է, որի պատճառով փողոց լցված ջուրը դարձել էր մերկասառույց, մեքենան էլ սահել էր:
Նոյեմբերյանի ավագանու անդամներն են քաղաքապետին դժգոհություններ ներկայացրել՝ «Հայջրմուղկոյուղում» առկա բազմաթիվ վթարների կապակցությամբ: Դրանք տեւական ժամանակ չեն վերացվում:
Նման մի հին, ամիսներով չվերացվող վթար կա Կամոյի փողոցում, 1991 թվականին Ոսկեպարի անտառում զոհված նոյեմբերյանցի ոստիկանների հուշարձանի մոտ (նկարում): Փորված տեղից ջուրն արտահոսելով` քանդում է անցյալ տարի համայնքի միջոցներով ասֆալտապատված հատվածը: Թեեւ 1997 թվականին կառավարության որոշմամբ խմելու ջրի օրվա կարգավորիչ ջրամբարները եւ ջրմուղ-կոյուղու Նոյեմբերյանի քաղաքային ներքին ցանցը պետք է հանձնվեր համայնքին, սակայն դա չի կատարվել: Քաղաքի ավագանին դեմ չէ, որ մինչեւ 2015 թվականի սկիզբը դրանք մնան «Հայջրմուղկոյուղու» տնօրինման տակ, բայց որոշել է իր հաջորդ նիստին հրավիրել «Հայջրմուղկոյուղի» ընկերության «Նոյեմբերյան» ենթատեղամասի տնօրեն Գառնիկ Մամյանին եւ նրանից բացատրություններ լսել քաղաքի ներքին ցանցում տիրող մտահոգիչ վիճակի վերաբերյալ:
Ոսկան ՍԱՐԳՍՅԱՆ
Կարդացեք նաև
