Նոյեմբերյանի ավագանու նախօրեի նիստում ավագանու անդամներն ասացին, որ քաղաքապետարանի ենթակայության ներքո գտնվող հիմնարկների աշխատողները երբեմն իրենց վատ աշխատանքն արդարացնում են նրանով,որ աշխատավարձը ցածր է, ասելով`«մեր ստացածն ի՞նչ է, որ»: Նոյեմբերյանի մշակույթի տան հավաքարարը եւ ռեժիսորը, գեղմասվարն ու դերասանը ստանում են հավասար` նվազագույն 32 500 դրամ աշխատավարձ: Քաղաքային մարզադպրոցի հավաքարարը ստանում է 37 500, իսկ մարզիչը` 32 500 դրամ: Քաղաքապետ Վանուշ Ամիրաղյանն ասաց, որ տեղական բյուջեն չունի աշխատավարձերը, թեկուզ 1000 դրամով, ավելացնելու հնարավորություն: Քաղաքապետը տեղեկացրեց, որ տարիներ շարունակ հաստիքներն ավելացել են, 2005 թվականին քաղաքապետարանի եւ դրա ենթակայության տակ գտնվող հիմնարկներում կար 106 հաստիք, հիմա` 145, որ առնվազն 40 հաստիք կարելի է կրճատել: Սակայն փոքր քաղաքում, ուր աշխատատեղերը քիչ են, որեւէ մեկին աշխատանքից ազատելը խնդիր է, այն էլ` նախընտրական տարում:
Ոսկան ՍԱՐԳՍՅԱՆ
