Չորեքշաբթի Բելգիայից Սակրամենտո է փոխանցվել Դանիել Կարապետյանը, որը երրորդն է այն չորս անձանցից, որոնք կասկածվում են 2003-ին Սակրամենտոյում կատարված սպանության առնչությամբ: Այս մասին հաղորդում է News10.net-ը, որը հղում անելով Սակրամենտոյի ոստիկանության լրատվական ծառայությանը՝ նշում է, որ քննիչները պնդում են, թե վկայություններ կան, որ Կարապետյանը, Գագիկ Կարապետյանը, Արարատ Մանուկյանը եւ Եղիազար Կարապետյանը առնչություն ունեն 2003-ի սեպտեմբերին կատարված մի սպանությանը: ագիկ Կարապետյանը եւ Մանուկյանը կալանավորվել են ու դատապարտվել, իսկ Դանիել եւ Եղիազար Կարապետյանները փախել էին երկրից: Հետաքննությունների դաշնային բյուրոն՝ FBI-ը որոնում էր նրանց տարբեր երկրներում՝ այդ թվում նաեւ Հայաստանում, Ռուսաստանում, Ֆրանսիայում եւ Բելգիայում:
Եղիազար Կարապետյանը դեռ չի հայտնաբերվել: Նրա մասին տեղեկություններ հայտնելու համար խոստացված է 1000 դոլար պարգեւ:
