Այսօր` ուսանողների օրվա կապակցությամբ Հայաստանի Հանրապետական կուսակցության երիտասարդական կազմակերպության և Հայաստանի պետական Մանկավարժական համալսարանի ուսանողական խորհրդի նախաձեռնությամբ միջոցառում էր կազմակերպվել օպերայի և բալետի ազգային ակադեմիական թատրոնում: Միջոցառման սկզբում հայտարարվեց ՀՊՄՀ-ի «Լավագույն ուսանողի» անունը: Թեկնածուները տասն էին` տարբեր ֆակուլտետներից: «Լավագույն ուսանողի» կոչմանն արժանացավ Հոգեբանության և սոցիալական մանկավարժության ֆակուլտետի ուսանողուհի Սառա Վանյանը, ով երկշաբաթյա ուղեւորության հնարավորություն ստացավ` դեպի Լոնդոն: «Ինձ համար անակնկալ էր, չէի սպասում, որ հենց ես լավագույն ուսանող կընտրվեմ: Կարծում եմ` բոլորս էլ արժանի էինք: Այս կոչումը կրելը մեծ պատասխանատվություն է և ես ամեն ինչ կանեմ սպասումներն արդարացնելու համար», – «Առավոտ երիտասարդականի» հետ զրույցում ասաց Սառան: «Լավագույն ուսանողի» մյուս թեկնածուները չեն տխրում, գիտակցելով, որ իրենցից մեկը պետք է արժանանար մրցանակին: «Ես շատ ուրախ եմ Սառայի համար, բոլորովին չեմ տխրում, որ ինքս չեմ անցել: Կարծում եմ թեկնածու լինելը արդեն իսկ մեծ հաջողություն է», – ասաց Կուլտուրայի ֆակուլտետի ռադիոլրագրության 3-րդ կուրսի ուսանողուհի` Միլենա Մաթևոսյանը: Սակայն կազմակերպիչները անակնկալ էին պատրաստել նաև մյուս թեկնածուների համար` նրանց հնարավորություն տրվեց մեկնելու Շարմ էլ Շեյխ:
Նոյեմբերի 17 – ը ուսանողների միջազգային օրն է` ի հիշատակ 1939 թվականին նացիստների դաժանության զոհ դարձած մի խումբ երիտասարդների: Մի քանի տարի անց` 1941 թվականին, միջազգային ուսանողական խորհրդը Լոնդոնում նոյեմբերի 17-ը հռչակեց ուսանողների միջազգային օր:
Տիգրանուհի Թասլակյան
