Այսօր՝ նոյեմբերի 17-ին, ուժեղացված ռեժիմ էր հայտարարվել Երեւանի Կենտրոն-Նորք Մարաշ վարչական շրջանների ընդհանուր իրավասության դատարանում նշված դատարանի դատական կարգադրիչների ստորաբաժանման աշխատակիցների կողմից: Ինչպես Aravot.am-ին հայտնում է ֆոտոլրագրող Գագիկ Շամշյանը, դատարանում տեղի էին ունենում դռնփակ մի քանի դատական նիստեր: Նախ դատավոր Մխիթար Պապոյանը եւս 2 ամսով երկարացրեց ոստիկանության քրեական հետախուզության գլխավոր վարչության նախկին պետ, գեներալ-մայոր Հովհաննես Թամամյանի կալանքը: Ֆոտոլրագրողը հայտնում է, որ իր տեղեկություններով՝ Հովհաննես Թամամյանին դատարան չէին բերել:
Դատավոր Մխիթար Պապոյանի կայացրած դռնփակ դատական մեկ այլ նիստով եւս 2 ամսով երկարացվեց Քյարամ Ամոյանի խափանման միջոց-կալանքը: Ամոյանը հանցագործ աշխարհում հայտնի գող Ճակոյի ազգականն է, որը կասկածվում է մի քանի պետական պաշտոնյաների նկատմամբ կատարված ավազակային հարձակումներ կատարելու մեջ:
Եւս 2 ամսով երկարացվեց «Գառնիի Սուրիկի լավաշ» ընկերության տնօրեն Արտուշ Հակոբյանի կալանքի ժամկետը: Այստեղ եւս երկարացման որոշումը կայացրեց դատավոր Մխիթար Պապոյանը: Նույն դատարանում դատավոր Գայանե Կարախանյանի որոշմամբ եւս 2 ամսով երկարացվեցին Արթուր Մանուկյանի եւ Արամ Հայրապետյանի խափանման միջոց կալանքները: Դռնփակ դատական նիստերից հետո բանդայի գործով կալանավորված բոլոր կասկածյալներին տեղափոխեցին Նուբարաշեն քրեակատարողական հիմնարկ, որից հետո Կենտրոն-Նորք Մարաշ վարչական շրջանների ընդհանուր իրավասության դատարանում արշալույսները խաղաղվեցին՝ ուժեղացված ռեժիմը վերացվեց:
