Կրակայրիչը օգտագործել էր որպես սառը զենք
Մալաթիա-Սեբաստիա վարչական շրջանների ընդհանուր իրավասության դատարանի դատավոր Տիգրան Պետրոսյանը 7 տարի 6 ամիս ազատազրկման է դատապարտել Սերգեյ Աբրահամյանին, Բագրատ Մանուկյանին եւ Նվեր Ներսիսյանին: Եռյակը մեղադրվել էր ավազակային հարձակում կատարելու համար: Ըստ գործի նյութերի, ավազակային հարձակում կատարելով, նրանք ակնկալել են ձեռք բերել մինչեւ 1 միլիոն դրամ:
Հայտնվել են Լենինգրադյան փողոցի շենքերից մեկում, սեղմել են Օֆելյա Մնացականյանի բնակարանի զանգի կոճակը: Տանտիրուհին բացել է դուռը, տեսել մինչեւ աչքերը փակած հանցագործին: Նա ատրճանակի նմանվող կրակայրիչով հարվածել է տանտիրուհուն: Նախատեսել էին, որ նախազգուշական կանչից հետո կմիանան կրակայրիչով «գործընկերոջը»: Սակայն չեն հասցրել, քանի որ տանտիրուհու ամուսինն է օգնության հասել:
Տանտիրոջ՝ Լեւոն Միքայելյանի հարեւանները ձայների վրա դուրս են եկել, հանցագործի շալվարի գոտիով կապել են նրա ձեռքերը եւ զանգել ոստիկանություն: Իհարկե, դատարանում հանցագործները լաց լինելու չափ պնդում էին, որ իրենց ծեծել են Լենինգրադյանի բնակիչները:
Կարդացեք նաև
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
