Երեկ «Առավոտը» փորձում էր պարզել, թե ի՞նչ արդյունքներ են գրանցվել ԱԺՄ-ի շուրջ ԱԺՄ-ից ստեղծված կուսակցությունների վերամիավորման գործընթացում: Հիշեցնենք, որ այդ առիթով մամուլում բոլոր հավանական եւ անհավանական սցենարները քննարկվեցին: Բայց արի ու տես, որ՝ «անունը կա, ամանումը չկա»: ՀԺԱՄ առաջնորդ Վահրամ Մկրտչյանն «Առավոտի» հարցին ի պատասխան՝ ասաց, որ գործընթացն «անհասկանալի վերջնափուլում» է, քանի որ հարաբերությունները գործընկերայինից այն կողմ դեռ չեն անցնում: Պատճառների մասին մեր զրուցակիցը չցանկացավ խոսել, միայն ասաց, որ առաջիկայում պատրաստվում են նշել ՀԺԱՄ-ի հիմնադրման 10-ամյակը, եւ այդ առիթով տեղի ունենալիք հանդիսավոր արարողության ժամանակ ՀԺԱՄ-ը կհայտարարի իր քաղաքական նախասիրությունների մասին, կհստակեցնի, թե որ ճամբարում են տեսնում հետագա քաղաքական գործընթացներին իրենց մասնակցությունը:
«Առավոտ» օրաթերթ
